Mizoramah Covid-19 hri thar, Omicron vei hmuh chhuah la awm lo mah se, tun hnai boruak atanga thlirin sorkar hlauhthawnna a lian tan.
Covid-19 thupuangtu, Dr Pachuau Lalmalsawma chuan, “Mizoramah Omicron hi kan la hmu lo a. Mahse, nimin atang vel khan ‘a awm tawh hial ang emaw aw’ tih hi chu kan rilruah a lian deuh,” tiin, nimin khan The Zozam Times zawhna a chhang.
Ram pawn atanga Mizorama khualzinmi lutte lakah sorkar chuan fimkhur theih tawpa hma an lak thu sawiin, “Tun ang bak hi chuan a ngaihna a awm rih chuang lo. RT-PCR test hmangin foreigner-te chu kan up hmak hmak a, an positive chuan genome sequencing turin kan thawn. Chubakah, a positive lote pawh a hnu ni riatnaah RT-PCR-in test leh tura tih an ni,” tiin, tuna an kalpui mek dan a sawi.
Foreign atanga Mizorama khualzin lutte tih loh chu a hranpa bawhzui ngai rih lutuk loa an ngaih thu leh a tam zawk chu mahni ina inkhung hrang tura tih an nih thu a sawi a. Tun hnaia ram pawn atanga lut hri kai hmuh chhuahte chu an sample laka genome sequencing tura thawn an tum thu sawiin, “Phai atanga rawn haw positive-te chu, a zavai pawhin a ngai kher lo ang a, representative sample ang deuh tura thawn kan tum a, chu chu thu kal mek chu a ni,” a ti.
Dr Pachuau Lalmalsawma chuan sorkar laipui duh dan angin tunah hian thla khatah vawi hnih genome sequencing tura sample an thawn thin thu leh, a huho deuha case a awm emaw, raltlan zingah positive an awm emaw chuan a hma thei ang bera sample thawn nghal tur a nih thu a sawi bawk.
Omicron-ah pawh hian Covid-19 hri danna hian a la ziaawm phahtir tih sawiin, “Awmzia nei lo anga thuthang dik lote pawh a lo awm thei a. Vaccine hi chu eng chi-ah pawh a tha vek. ‘Vaccine nge nge’ tih hi chu zirchianna atanga an thupui hi chu a la ni deuh zel,” a ti.