Union Vety Minister Parshottam Rupala chuan Mizorama vawk pul hri, African Swine Fever (ASF) leng avanga department hriatpuinaa vawk suatte zangnadawmna pek chungchang chu tihfel thuai a nih tur thu Animal Husbandry & Veterinary Minister Dr. K. Beichhua a hrilh.
Union minister hian Guwahati-ah Assam sorkar leh National Dairy Development Board ten thawhhona thuthlung an ziah hmanpuiin, programme kar lakah Dr. K. Beichhua chuan Union Minister Rupala hi a kawm a, Mizorama ASF vanga department hriatpuinaa vawk an suatte zangnadawmna pek chungchang a sawipui a. Union minister chuan tihfel thuai a nih tur thu a hrilh.
Dr K Beichhua hian central ministry programme pawimawh, Re-Aligned National Livestock Mission chungchang te, AH&Vety Infrastructure Development programme chungchang te, Livestock Health chungchang te leh Dairying Development programme chak leh hlawk zawka Mizorama kalpui dan turte a sawipui nghal bawk.
Union Vety Minister Rupala chuan Mizoram tana thu thlente chu a theih anga lo bawhzuisak tur leh NBBD lam pawh a tul anga MULCO hmasawnna tura thiamna ngaite leh thurawn pein, chhawmdawl turin a hrilh nghal a, Ministry of Fisheries, Animal Husbandry & Dairying atangin a theih anga MULCO tihchangtlun dan tur ngaihtuahsak zel a tum thu a sawi bawk a ni.
Guwahati-ah hian vety minister hi AH&Vety Secretary Lalzarmawii, IAS; Director Dr. H. Laltlanmawia, MULCO MD leh official dangten an tawiawm a ni.