Aizawl: Disaster Management & Rehabilitation Minister Lalchamliana hoa sorkar hotute thukhawm chuan Mizorama raltlan lutten COVID-19 an put darh loh nan a tul anga ruahmanna siama duang turin committee din an rel.
Thutkhawmah hian Assam Rifles hotute chuan raltlan lut reng reng chu endika eng emaw chen khung hran a tul thu leh hengah hian VC/VLTF-te nen thawhhona an neih a pawimawh thu an sawi a, tun hnaia raltan lut tam ber chu Siaha district-a Zawngling kaltlanga lut an nih thu leh ramri kânna hmun 5/6-ah uluk leh zuala testing leh screening kalpui a tul thu an sawi.
Indo-Bangladesh ramri vengtu, BSF hotute chuan ramri kânnaa lut report an neih loh thu leh tun dinhmunah an ruahmannate chu a tha tawk tih sawiin, “Harsatna engmah a awm rih lo,” an ti.
Myanmar ramri dep district – Siaha, Lawngtlai, Champhai, leh Hnahthial DC-te chuan video conferencing kaltlangin Myanmar raltante hriselna dihmun leh hri danna an pek tawh zatte an report bawk.
DM&R minister hoa thukhawm chuan raltlanten Covid-19 an put darh loh nan a tul anga ruahmanna siama duang turin home secretary kaihhruaina hnuaiah, Assam Rifles, police, Health & Family Welfare Department, DM&R Department, Siaha leh Champhai DC telna committee din an rel a ni.
Thutkhawm kaihruaitu, Lalchamliana chuan Covid-19 hri thar, Omicron darh chak dan dinhmun thlirin ramri kâna Mizoram lutte chu a theih chin chinah Covid-19 an kai leh kai loh endik a tul thu sawiin, heng mite hriselna dinhmun chik taka endik leh a tul chuan heng mite hi dah hran a pawimawh tih a sawi.