Ram puma Omicron variant avanga coronavirus kai an pun chak mek laiin Assam chuan inkhuahkhirhna thar a tichhuak a. Invenna la la loten bazar (mall) leh khualbuk an lut a nih chuan Rs. 25,000 chawitir an ni dawn.
Invenna bikima la lote hi vantlang hmuna an awm phal an ni dawn lo va. Khualbuk, thingpui dawr, cinema hall leh mall-ah an lut a nih chuan a neituten Rs. 25,000 an chawi a ngai ang.
Sorkar pisaah pawh thawktute chu invenna an la lo a nih chuan January 15 hnuah chuan luh phalsak an ni dawn lo va. Hlawh nei lovin an chawlhtir ang.
Assam-ah hian hri leng darh zel tur ven nan Covid kai tawh phawt chu Omicron kai anga en zel an ni dawn a. “Omicron rinhlelh an tam a; mahse, an kai a ni tih finfiah chhungin hun a duh si a. Tunah chuan Omicron anga enkawl vek an ni tawh ang,” tiin Chief Minister Himanta Biswa Sarma chuan Zirtawpni khan a sawi a. Hri kai chu ni hnihah a letin an pung hman zel tih a sawi a, January 20 hi an vanglai tur niin a sawi bawk.
Inkhuahkhirhna thar hi Inrinni atanga hman tan tur hi niin zan curfew pawh darkar khata sawn hmain zan dar 10:00 leh a tuk zing dar 6:00 thleng a ni tawh ang.
Nursery leh pawl nga inkar sikul khar a ni dawn a. Pawl 9 leh 12 inkar pawh chawlhkar khatah ni thum sikul kaiin ni hnih chu online-a zirtir an ni bawk ang.
Hmarchhaka state lian berah hian Omicron kai mi pakua hmuh tawh niin an vaiin an dam leh tawh a. Hri darh vanglai an thlen hunah chuan ni khatah mi 12,000 vel zetin an kai theih rin a ni.
Manipur-ah pawh hri kai pung thar leh mek avangin Inrinni atang vek hian inkaihhruaina thar hman a ni dawn a. An state lut turte chu Covid-19 an kai lo tih finfiahna an neih hmasak phawt a ngai tawh dawn.
K Rajo Singh, director, health services, Manipur chuan, “Thlawhna, lirthei hmanga mi tu pawh state lut tur chuan an lo luh hma darkar 48 chhungin Covid-19 an kai lo tih RT-PCR hmanga endikna an neih ngei a ngai a ni,” tiin Ningani khan hriattirna a tichhuak.
Manipur-ah hian darkar 24 liam ta chhungin hri kai mi 59 hmuh chhuah leh niin mi 1,25,964-in an kai tawh a. Enkawl lai mi 318 awmin mi 2,009-in an thihpui tawh a. An state hi India hmarchhaka Omicron variant kai hmuh chhuah hmasak berna a ni bawk.