Ram pawn atanga thlawhna hmanga India khawpui pakhat, Amritsar-a thleng, an thlen hlima Covid-19 an kai a ni tih hmuh chhuah mi 13-te chu khung hran an nih hmain an tlan chhuak.
Nilaini chawhnua Milan atanga a bika thlawk thlawhnaa thleng zinga mi 125 chuan hri an kai tih hi hmuh chhuah an ni.
An zinga mi panga chu tumhmun atang hian an tlan chhuak nghal a, mi palite erawh damdawi in atangin an tlan chhuak thung niin khawpui hotu pakhat, Sherjang Singh chuan a sawi.
Police chuan heng mite lakah hian thubuai an ziak lut.
India-ah hian Zirtawpni khan hri kai mi 1,00,000 chuang an awm belh a, mi thiamte chuan kar hmasa lam atanga hri kai pung chak leh hi Omicron vang ni ngeiin an ngai.
Italy atanga India pan thlawhnaah hian mi 160 an chuang a. Naupang leh nausen thenkhat, mi 19 chu endik an ni ve lo.
TV-a video tar lanah chuan tumhmun pawnah ambulance intlarin hri kaite hi damdawi in lamah phurh nghal zel an ni a. Mi tam tak a bul hnaiah an awm bawk.
Thleng thar zinga hri kaite hi Guru Nanak Dev Hospital-ah vek dah luh an ni.
Tumhmun atanga tlan chhuakte hi engtin nge an tlan chhuah theih hriat a ni lo va, damdawi in atanga tlan chhuakte erawh hi chuan damdawi ina thawkte bumin engtin emaw an chhuak niin NDTV channel an hrilh.
Police-te chuan an passport pawh tihtawpsak tumin an bei mek.
Amritsar Deputy Commissioner Gurpreet Singh Khehra chuan, “Zingah pawh an lo la kir lo a nih chuan chanchinbuah an thlalak tarin thubuai ziah luh a ni ang,” tiin NDTV a hrilh.
Amritsar khawpui awmna, Punjab-ah hian Covid-19 kai an pun leh mek avangin inkhuahkhirhna pawh an kalpui thar leh tawh a. Thawhlehni atang khan zan curfew puangin sikul leh college an khar.
India-ah hian mi maktaduai 35 chuang Covid kai awmin mi 4,83,000 vel an thi tawh.