Kazakhstan-a roreltu (authoritarian leader) chuan sorkar do zawnga chete chu inralrinna (warning) pawh pe hmasa lova kap nghal zel turin venhim hna thawktute a hriattir.
President Kassym-Jomart Tokayev-a hian tuialhthei man sang duh lohna lantir intanna, Almaty khawpuiah ‘mi sual (bandit) rual 20,000’ zetin khawpui hi an bei niin a sawi.
An rama tharum thawhna nasa tak thlengah hian a finfiahna awm si lovin ram pawn lam mi mi firfiak an inrawlh niin a sawi bawk.
Buaina chhuak mek zelah hian interior ministry chuan ralthuam nena che mi 26 leh security officer 18 an thi tawh niin a sawi.
Television-a thuchah a sawiah Tokayev chuan duh lohna lantirtute nena inbiakna neih chu awmze nei lo niin a sawi a, “Eng nge mi sual leh tualthattute nen kan inbiak a tulna?” a ti.
“Tual chhung mi leh ram pawn mi, ralthuam nena chea ruahmanna tha tak nei bandit nen kan inep mek a. Dik taka sawi chuan mi firfiakte an ni a. Kan tichhia a, kan puitlin tep,” a ti bawk.
Hetih lai hian eptute chuan firfiaka chetna thleng anga sawina hi a nih loh thu leh an pawm ve loh thu an sawi thung.
President Tokayev-a hian a ngen angin Russia leh an thenawm ramte atangin peacekeeping force an thleng tawh a, an ramah himna a awm theih nan hna an thawk dawn tih a sawi.
Venhim hna thawk tura chah luhte hi Russia kaihhruai Collective Security Treaty Organisation (CSTO) tangrual hnuaia sipai 2,500 an ni a. Tokayev-a hian a bik takin Soviet Union ram ni thina sipai a thawn avangin Russian President Vladimir Putin hnenah lawm thu a sawi.
A hmain president hian dan angin thupek kenkawh a nih thu a sawi a, hetih lai hian Almaty khawpui hmun lun laiah silai puak thawm hriat tur a la awm.
Hmun eng emaw zatah internet connection tihthih pawh tihnun leh a ni tawh a, Kazakh thuneitute leh CSTO sipaiten Almaty-a thlawhna tumhmun lian ber pawh thununin a hma ni chiah khan duh lohna lantirtute kut atangin an la let a ni.
Kazakhstan-a buaina hi Pathianni atanga intan kha a ni a. Kazakh miten an lirthei atana an hman ber, liquefied petroleum gas (LPG) man a let thawka tihsan duh lohna atanga intan a ni.
Sorkar chuan thla ruk hnuah a man hi ennawn a nih tur thu a sawi a; mahse, man sang duh lotute hi an hup bet zo ta chuang lo va, politics lama inbeihna thleng zuiin buaina lian zawk a thleng ta a ni.
Kazakhstan ram hi mi pakhat thuneihna ram (authoritarian) nia sawi thin a ni a, inthlanah pawh rorel lai party-in hnehna chang zelin vote tla pawh 100% dawn an hmu zel a. Politics-a eptute an che thei meuh lo.