- F. Vanlalrochana
2022 kum thar kan lo chuang kai ta a. 2022-ah hian engnge kan tawn dawn kan hre lo a. Engnge lo thleng dawn kan hre lo a. Ni tin maia hmachhawp leh ruahmanna fel awm lem lo a, a rem dan dana nun mai rikngawt chu tum lo ila, kan hun kalta aia mi tha zawk erawh nih tum theuh ila a tha awm e.
Kuminah hian kum danga kan la tih ngai lo thil tam tak tih tur a awm thei anga. Kumina kan ni tin tihtur thil pahnih khat lek ka han rawt chhin anga. Zawm harsa tak lem lo tur, inthlahdah remchang si lo a ni a. Zawm theih mai tur a ni a. Lo zawm tum ta ila. Kan zawm thei a nih chuan, nakkum tun ang hunah, kan hlawkpui zia kan hmu thei ang tih hi ka sawi ngam a ni.
- Lehkha chhiar tam: Kuminah hian lehkha i chhiar tam ang u. Kan hnam than zelna atan hian a pawimawh a nia! Mumal takin kan chhiar zat kan chhin chhiah anga. Phone-ah pawh kan chhiar zat a chhin chhiah theih a. Note bu leiin, kut ziak pawhin a chhinchhiah theih. Kan thil chhiara pawimawh kan tihlai kha, ziak chhuak peih phei ila chu a tha leh zual awm e.
Lehkha chhiar thatna, hlawkna hi kan sawi thin a. Lehkha chhiar thangte chuan, kan tawng vek tawh ang, mi mal tak pawhin sawi tur kan hre teuh ang. Sim chi a ni lo a. Uar telh telh chi a ni. Kumhlui aia tam zawk chhiar theuh turin chona ka han chhawp chhuak a. La chhiar ngai mang lo pawhin, bu 5 tal chhiar tumin rilru i siam ang u.
Hnam anga dinchhuahnan te, Khawtlang nun siamthatnan te lehkhabu chhiar uar hi thui takin a pawimawh.
Mi puitling, mi tak tak ni tur chuan lehkha chhiar hi kan tih makmawh a ni. - Diary ziak theuh ang u: Kan hriatrengna (Memory) tih changtlunna leh tih nghehnan pawh a tha. Chumai a ni lo, a hunlaia kan ngaihtuahna te dahthatnan a tha.
Social mediaa kan ngaih dan dengkhawng tak tak kan dah fo mai hi diary-ah ziak lut daih ila. Mi pawi pawh kan sawi tlem deuh ang. Kan vei zawng zawng, tawngkam insum kar loa vantlang hmuhtura pho chhuah hluai mai hi thil tul ber a ni lo a, thil hrisel ber pawh a ni lo. Kan khawtlang, kan hnam, kan rama thil thleng hi chhinchhiah ila. A tul huna en let leh a tan pawh a tha. ‘Public Memory is short,’ tih a ni a kan rama thil thleng tam tak hi, mi tam zawk hian kan hre zui lo fo. Hemi man fuh laklawh Tuten emaw mipui min bum leh mai thin. News-in a sawi bak a hunlaia kan rilru puthmang hi record a tha.
US President parukna John Qyincy Adams khan kum 77 chhung a diary a ziak a. Tun hnu hian a buin an ti chhuak a. America History pawimawh tak pakhat a ni zui ta a ni. Ronald Reagan-a diary pawh a buin a chhuak. Anne Frank-i dairy pawhin khawvel a nghawng hi.
I diary ziak la, mi chhinchhiah loh, i nun, i chhungte nun, in khawtlang nun, in ram nun kha chhinchhiah teh.
Tlangkawmna: Lei leh Ni inlaichin dan milin mihringin Hun kan tih hi a siam chawp a ni mai a. 2021 leh 2022 pawh Calendar a inthlak hret tih loh chu danglamna hranpa a awm lo. 2021 kan calendar hman ang kha 2010 khan hman a ni tawh a. 2027- ah hman leh a ni ang. 2022 calender hi 1910, 1921, 1927, 1938, 1949, 1955, 1966, 1977, 1983, 1994, 2005, 2011-ah te hman a lo ni tawh a. 2033, 2039, 2050 etc-ah te hman leh a ni ang…
Hun hi mihringin amah mil tura a siam ni mah se, hun chungah hian thu kan nei si lo. Leiin ni a helna kawngah takngialah pawh thu kan nei lo.
Mihring thiamna leh theihna hi sang hle tawh mah se, kan nun khawihtu tak tak thilah hian thu kan nei lo hle. Chutiang nisi chuan, Pathian awm kan han ring lo a. Pathian thute kan ngaihtuah duh lo lui fo bawk.
Chatuan chunga Thuneitu Lalpa kuta tluk luh hi a him ber.
Kumthar Chibai u.