India rama kum 18 hnuai lam basketball inelna lianah Mizoram junior team chu an group-ah sang ber nia round dawt leh an tlin hnuah Zirtawpni khan Chandigarh lakah 79-64 in an tlawm.
Indore a 71st Junior National Championship 2022 khelh mekah Mizoram hi Level 2 team niin an tiatpui awmna Group E-ah awmin Andhra Pradesh, Puducherry leh Bihar te an hneh zawn hnuah an sang ber a. Level 2 team che tha dangte nen Level 1 a kaisang turin knockout inkhel an hmachhawn leh a, Chandigarh lakah an vanduai.
Chhun dar 11:30 a inkhelah Mizoram hian first quarter ah point 19 score in hma hruai hmasa mahse an khingpuite chu tawnhriat leh pumrua-ah an pha lova. Fourth quarter-ah theihtawp chhuahin beilet mahse Chandigarh hmahruaina an pawtthla zo tawh lo.
Chandigarh hian nimin tlai khan Haryana leh Himachal Pradesh inkhel a chak zawk an hmachhawn lehnghal dawn a, an chak chuan Level 1 team ni turin an tling ang.
Mizoram team hi vanduai mahse group stage an khelh danah fak an hlawh hle a. State pawn team, pumrua a lian zawkte leh tawnhriat ngah tawhte chhawr lakah an basketball khelh avangin hmuhnawm tih hlawh an ni. Hei vang hian an player-te pawhin ngaihven an hlawh.
Tournament ngaihventu army recruiter te chuan Mizoram player zawng zawng hi Army-ah trial neih an duh chuan an buaipui tur thu an sawi a. Bengaluru a Christ University Basketball coach pawhin an university a zir duh an nih chuan a quota in admission a pek tur thu a sawi bawk.
Mizoram manager Michael Zohmingsanga chuan, “Champion zo ta lo mah ila kan naute inkhelh dan leh an offer hrang hrang kan hmuhah hian kan lawm khawp mai.” tiin a sawi.