Mizoram Journalists’ Association (MJA) chuan kumin hian kum 50 a tling dawn a, nimin khan Aizawl Press Club-ah golden jubilee lawmna bul tanin, MJA Founder President Lal Thanhawla’n jubilee lawmna a hawng a, jubilee mei a det a. Nimin vek khan district hrang hrangah pawh jubilee lawmna bul tanin mei an det a, nizan lama mei det district thenkhat an awm bawk.
MJA founder president chuan Zoram puma MJA member-te golden jubilee chibai bukin, MJA an din tirh lai ngaihtuahin chanchinbu leh chanchinbumiten hma an sawn nasa ta chu lawmawm a tih thu a sawi a. “Kan zinga hnam dang cheng veten an chhiar theih tura saptawng chanchinbu hial kan nei ta te, phai lam media liana news correspondent hnathawk kan awm ve ta nualte hi a chhuanawm a ni,” a ti.
Journalist hna chu hna pawimawh leh zahawm tak a nih thu sawiin Lal Thanhawla chuan tawng chungchangah, a bikin thangthar lo awmte kaihhruaitu leh zirtirtu ni turin chanchinbumite a ngen a. “Mizo tawng hi tawng mawi leh hausa tak a ni a, thangthar zelte tawngah an fimkhur ta lo hle a, Mizo tawng dik tak an hman theih nan chanchinbu hi a kaihruaitu ni se ka duh,” a ti.
Lal Thanhawla chuan “India ramah Mizoram chu state chhung huap chanchinbu nei tha ber leh nei tam ber pawl kan ni,” tiin, ropui a tih thu a sawi a. Tun aia changtlung leh tha zawka kal zel turin chanchinbumite duhsakna a hlan bawk.
MJA hi kum 1972, March 23-ah din niin, hruaitu hmasate chu – President – Lal Thanhawla (Mizo Aw), Vice president C Chhunbura (Hmar Arsi), Treasurer Lalbuaia (Mizo Arsi), Secretary General RK Pautu (correspondent, Times of India), Secretary Biaksanga (Tawrhbawm) te an ni a. Founder President Lal Thanhawla’n term thum, 1972 atanga 1977 thleng nihna a chelh.
A tirah MJA chuan Aizawla chanchinbumite bakah district danga chanchinbumi, mahni thua mi mala inziak lutte chauh a huam thin a, district tinah anmahni pualin journalists’ association a ding thung a. Kum 2005-ah Mizoram puma journalists’ association zawng zawng chu MJA-ah an inchhungkhawm ta a, tunah hian Mizoramah MJA member 195 an awm mek a ni.
Aizawla MJA Golden Jubilee lawm bul tanna leh mei det hi MJA President Zonunsanga Khiangte-in kaihhruaiin, kum 60 tling chin, kum 30 chhung MJA member ni tawh, MJA-in prominent journalist-a a puan, mi 12-te hming puan leh an chanchin tawi sawi niin, inhmelhriattirna hun hman a ni bawk.
MJA Golden Jubilee lawmna pui ber chu March 23-ah Aizawlah buatsaih tum a ni.