Pawl 8 chin hnuailamte tana rampum huapa ni 100 chhung lehkha chhiar campaign neih mek chu nimin khan Mizorama kalpui ve turin School education secretary Dr Lalzirmawia Chhangte-in a hawng.
School education secretary chuan hnam hmasawn nan leh lungrual nan leh kawng hrang hranga hmasawn nan lehkha chhiar a pawimawh tih a sawiin, lehkha chhiar boruak siam thar leh a tul thu a sawi a. Lehkha chhiar hlutna sawiin “Tunlai khawvelah electronic hmanrua a lo hluar a, hei hian lehkha chhiar a ti tlem a, mi zawng zawngin mobile phone leh laptop te an khawih nasa ta hle a, heng khawih nasat hian hriatna tha nei turin lehkha chhiar ai a awh zo lova, lehkha chhiar tluk a awm lo” a ti.
“Rilru zir mi ten an sawi danin lehkha chhiarin thluak a tichak a, chauh rimtawng a ti tlem a, muttuina te pawh min pe” School education secretary chuan a ti a. “Depression a ti tlem a, dam hun chhung a tisei bawk” tiin ni 100 chhung lehkha chhiar beihpui chu tha taka bawhzui turin thawktute leh kalkhawmte a sawm a ni.
Dy Director, School education Lallianzuali Bawihtlung-in ni 100 chhung lehkha chhiar beihpui chu India rampum huapa kalpui mek a nih thu sawiin, union minister-in a hawn hnuah state hrang hranga kalpui tura bawhzui mek a nih thu a sawi a. He programme hi class VIII chin hnuailam tan a nih thu leh naupangte tan lehkha chhiar chu phurrit ni lova, a hlimawm thei ang bera chhiartir tur a nih thu a sawi bawk.