- David Zochhuanmawia (Vida Hrahsel Saza)
Mi lâr (Celebrity) hrilhfiahna hi Mizo Dictionary Apps, ka mobile-a ka hman mêkah chuan ‘MI CHALLANG’ tiin a inziak a. Khawtlâng mi ngêlnghet; a pui a pang thlenga kan hriat te hi an ni phawt mai. Mi challang ni tùr chuan mi bik nih a ngai a, thiam thil bik (Zai, Music) thiam emaw, zirna lam thiam bik nih emaw, khawtlang rorelna leh ram rorelna a ni emaw, mi aia chungnung, langsar bik nih a ngai a ni. An \awngkam khatin awmzia a nei \hin hle a, hemi avang hian an chetsual palh pawhin an langsar bik \hin hle a ni. Mizo mi lâr tam tak zingah pawh ninawm khawpa a chhe zâwnga lâr belhchhah kan hriat hlêi hlûi tawh hi!
Kan àwn lam tihchian ngam-
A sâp\awng takin, Trend (àwn lam, ngér, pan lam) hi \halaite’n kan nei \heuh a. Kan ngaihsan zâwngah BTS an ni emaw, Blackpink emaw, Maroon 5, Boomarang, Rosy K. Remsangpuii, Revd. Dr. Chuau\huama, Pu Zoramthanga (President, MNF), Pu Lalsawta (President, MPCC), Pu Lalduhoma (Leader, ZPM) an ni emaw; he àwn lam nei, nger lam nei khawvelah hian mizo \halaite hian eng hi nge kan trend dik tak, tih hi kan in zawh nawn a va ngai tehlul êm! Zaithiam lama trending leh ram hnuk khawih thila trending te, thlarau chaw min hlui \hin tute lama trending te hi a inang thei lo ang tih a rin theih a. |halaite’n rilru ngaihtuahna kan sen nasat a, kawng khat chauh lo deuha ngaihtuahna kan sen zau a va hun ta êm!
Zoram pawnah Zoram lar-
Zoram pawnah Zoram ti lartu an awm a, tun hnaiah hmuh theihin a lang a, kan phak tawkah Sports Discipline hmangin mizote’n hming kan chher chho zel a nih hi! National Junior Volleyball Championship 2021 ah mizote la thlen ngai loh, Team Mizoram (Boys) in Quarter final an thleng a. Tunhnaia khelh, National Basketball Junior-ah pawh Pool match-ah hneh loh nei lovin Mizoram Team an che \ha a nih kha! Chutiang zelin Sports Discipline dang Cricket-ah te, Weightlifting-ah te, Boxing etc. thlengin, Zoram hming ti \hatu tam tak an awm a. ISL khelh mekah pawh Zoram hming ti \ha a, ti lâr zual zel tùrin, Odhisa Captain atan mizo tlangval, Jerry Mawihmingthanga ruat a nih tâk bawk hi.
Zoramah erawh Zorama a lar-
Tunlaiin Awmtea hming a lar hle a, a lar chhan erawh kan Chief Minister zahawm tak nena chanchin an neih avang a ni. Mimal ngaihdan tawite ziah ve châknain min túr tlat avangin tawitein han sawi ve leh ila- Pathian biak buk pawh zah zo lo khawpa CM zahawm tak, pawn dum va bah tir kha eng rau nge, tih lam chu Revd. Chuau\huama te sawi awma mawi zawk a ni a. Ka sawi ve duh zawk tak chu, State Chief Minister meuh Security-te kha khaw nge an awm? Pawn dum chauh bah tir lovin, chem emaw, silai emaw keng palh ni ta se la; engtin nge a nunna an chhan hman ang? Biak In a ni emaw, vantlâng hmun (Public) ah chuan hneh taka vêng tùr an ni si a. Thilpek pe a, chêng nuai 1 pe tùr pawh ni se, khatiang hunah kha chuan tumah ka hmuh tir hauh lo ang; Pathian biakbuk thianghlim a ni tlat! Tunhnaia Punjab-a Prime Minister Security \ha lo, tia inpuhna chungchangah pawh, Punjab Chief Secretary leh DGP te kha a mawhphurtu bera puh an nih daih kha!
Celebrity nih hi a namai lo-
Mi challang (Celebrity) ni tùr chuan \awngkam leh nunphung fimkhur a ngai em em a, vawi 1 \awng sual emaw, chetsual a pawi hle a. Mipui thinlungah ser nung nasa tak a tuh thei a ni. Chêng nuai 3 in dawng dawn, NLUP dawng tawh pawhin in dawng leh vek dawn tih te; 2018 khan, lo thlir mah rawh u, kum hnih/thum a ral ang a, kawng chhawng kan siam ang a, Aizawl hi traffic jam free-ah kan chhuah dawn tih te; kan sorkar hunah chuan vai buhfai kan ring tawh lo ang tih te; khawizu leh hnute tui luanna ramah Mizoram siam kan tum tih te; mipui hnena sum tam zia sawi reng a, sorkar hnathawk hlawh a huna la thei loa pek chhawk an ni te, GPF withdraw hleih theih loh te, mipui mamawh huna Health care duh anga bill theih loh a ni te; chaw, sa, thlai leh oil-a intodelh turin senso sang mah se kan kal dawn tih te hi, mi lâr (Celebrity) thil sawi àwma mawi a ni thei loin ka hria. Mahse, duh duh an sawi thei a, zalenna an nei. An tih hlawhtlin leh hlawhtlin lohah a innghat zawk a, chu lam chu Zoram mipuiin kan tehna tùr leh, kan hriatreng atana pawimawh zawk chu a ni.
A tlipna-
Mi dik, mi rinawm, Pathian \ih mi, contract hnathawh thûah pawh duhsak bik nei lo, ram hruaitu lû kan mamawh tak zet a ni. CAB/CAA kan thlawp dawn lo ti pung pung a, thlawp leh tute hi ram hmelma dik tak chu an niin ka hria. Kum 2022 kan lo chuangkâi a, COVID-19 chikhat Omicron dona kawngah Party dangte rawnin, chiai lovin fimkhur takin kan kal dawn, ti leh hnuhnawh tute hi, kum 2020 a COVID-19 hripui lo chhuah tirh pawha All Party & NGO rawn duh miah lotute tho kha an ni tih kan hriatreng a \ul bawk a. Kum 2023 inthlan a lo hnaih tak avanga chalâk taka mipui min bum an tum dante, \ha àwma lan an thiam dante hi fimkhur takin, invenna atana kan lo hman thiam lawk a \ha àwm e.
‘Kalphung thar’ hlak neih ai chuan ‘Sorkar \ha’ siam a \ha zawk a; ‘Hand holding policy’ ai chuan, \hahnemngai taka thawkte ‘\ang puihna’ a \ha zawk daih! Kalphung thar hlaka kan kal chuan Mizoram rorelna sang leh sorkar hnathawk te, mipui thlengin kan buai viauin a rinawm. \awng mawi lo ni lo se, mizo \halaite hi mitdel kaiha kaih kal a, kal dan zirtir ngai kan ni lo a, \hahnemngai taka mahni hma zawna thawkte \ang puihna pek a, sorkarin a tih tùr a tih hi a \ha viauin a lang bawk. Khawi Party hi nge rintlak a, an thutiama ding leh tùr tih thlir chung zelin, kum 2022 Pathian nena hmang \heuh tùrin duhsakna ka hlan a che u.