Nagaland-a hman mek, AFSPA hlih ngiatin mi 100 chuang, kum thalai leh kum upa tawh tak takte pawh telin, Supermarket, Dimapur atanga Kohima thlenga kea kawng zawhin an chhuak a. Biker eng emaw zatin an tawiawm bawk.
Km 74-a thui kawng an zawh turah hian an kalkawngah mi dang dangte pawhin an lo zawm dawn a ni.
Kawngzawhtute hian Thawhtanni zana Piphema-a an chawlh hnuah Thawhlehni hian Kohima an thleng dawn a, Nagaland Governor Prof. Jagdish Mukhi kaltlangin dan hlih a nih theihna turin memorundum an thehlut dawn.
Naga mipuiten kawng an zawh hi December 4-a Assam Rifles-in hel an beihnaa Oting-a mi haia civil mi 13 an thah leh a tuka Mon khuaa he thil duh lohna chhuaka inthahna thleng leh avanga neih a ni a. December 30 khan an state-ah hian AFSPA hi thla ruk dang hman tura pawh sei leh a ni zui.
‘March against AFSPA’ huaihawttute hian a telte chu thuneitute thu awih tur leh tharum thawhna emaw, vantlang thil tihchhiatna emaw engmah ti lo turin an ngen lawk.
Hei bakah hian sipaite deusawhna emaw, sipai chhaih emaw, sipai convoy tibuai zawnga che lo turin an ti bawk.
“Hei hi tharum tel lovin, muanawm taka kawng zawh a ni dawn a. A tawp thlengin ngawi rengin kan kal ang,” tiin coordinator-te chuan thu an chhuah.
Dimapur Deputy Commissioner Rajesh Soundararajan chuan Pathianni khan kawng zawh phalna pein a telte chu Covid-19 inkai darh lohna tura dan zamte zawm turin a ti.
A telte hi natna nei lo leh Covid-19 laka invenna la kim tawh an ni tur a ni a. A?huaihawttuten hri darh lohna tura dan zam an zawm em tih an kengkawh tur a ni tiin DC hian a ti bawk.