HMEICHHE HUANG
I BIALPA THAR HRILH KHER I BA LO!
Nakkin huna i inchhir lutuk lohna’n, i bialpa nena in ‘nih’ tirh laiin engkim hi i hrilhhriat kil kel kha a phu bik hauh lo a. I bialpa nena in inkar a lo ngheh a, ‘rei’ a daih zawk theihna’n in inkarah engemaw chen ‘in-kar’ i la siam ve deuh a ngai.
In chhungkaw chanchin emaw, i mimal chanchina i tih that leh chhiat zawng zawng kha i hrilh kher kha i bat a ni hek lo. Chuti a nih loh chuan, hlim taka bul tan emaw i intih lai khan ‘sorry’ tih thumal hian a zui ve thei che ania. Hei hi han chhiar chhin teh le :
Thlalak thawn : Tunlai khawvelah WhatsApp te, facebook leh eng eng emaw hmangtein a inthawn zung zung theih tawh a. Mahse, i ngaihzawng thar lakah fuh i intihna emaw, tha i intihna thlalak vel thawn hi pumpelh tum hram rawh. Midang thlalak nuihzathlak tak tak chu nise thuhran. Chuti a nih loh chuan, i bialpa thar phone kha amah chauhin a lo hum thei lo a, midangin lo khawih ruk sak an chin phei chuan i ti fuh chiah lo mai thei. Hmalam hun tuma’n kan hre lo a, chutiang bawkin i bialpa neih thar nen in inkar pawh a chhe thut thei tih hria la, rei lo te chhunga i thlalak thawn kha nakkinah a nuihzat lohna’n che thlalak thawnah insum rawh.
Password protection : Tun hnaiah inngaizawng an awmin, facebook account password inhrilh tawn a, account intawm ching hi an tam hle a. Hei pawh hi thil tha lo tak a ni. Inthen hnuah thlak let theih tho ni mah se, i bialpa thar hnenah phei chuan i password a dil che a nih chuan, mawi hnai takin hnar la.
A duh tak tak che a nih chuan i password hre kher lo pawhin a ringngam tur che a ni. I bialpa tharin i password hriat ve a tum a, i hrilh duh loa a titau a nih pawhin hrilh chuang suh.
I bialpa tharin a hriat ve loh tur thil tam tak i thiante nen in in ‘share’ thei a. A chanchin pawh in sawi dun duh thei. I inchhir lohna’n i password vawn him tlat ang che.
Phony business : I chhass kha thikthu chhe tak niin, i cellphone khawih a dil chein, i message dawn leh thawn zawng zawngte, i call log thlengin a ‘check’ sak thin che em?
Chutiang ti thei turin i bialpa lakah khan awm hauh suh la, nang phei chuan bul tan hauh suh ang che. I bialpa phone khawihsak i ching a nih chuan a ni pawhin i phone message ‘check’ chu a batah a ngai vat ang.
A bul tantu i nih phei chuan i thiam loh hulhual a ni. Chutianga in in ‘check’ sak ziah thin a nih chuan in inkarah inrinhlelhna a lo piang chho zut mai ang.
Chhungkaw thuruk : Bialpa thar i nei a, i bialpa chuan i chanchin bakah in chhungkaw chanchin zawh chang che pawh a nei anga; nang pawhin chutiang chiah chuan i bialpa chanchin leh chhungkua lam pawh hriat duh hun i la nei ang.
Hriatchian sa leh kan bulhnaia awm reng reng te an nih ngawt loh hi chuan inngaihzawn tirhin mimal chanchin a chhia a tha. chhunglam lam chanchin thlenga inhriatsak kilh kelh te hi thil harsa a ni a. Mahse, hmanhmawh lo la, hun remchangah sawi dunna hun remchang chu amahin a rawn inher chhuak duh chawk ania. Chuti a nih loh a, i bialpa’n in chhungkaw thuruk hriat tuma a zawh che chuan, thuruk chu thuruk a nih ang ngeiin thuruk vawng tlat ang che.
Bank information : Hei erawh hi chu nula, mahnia tal hrang thei chin leh tlema Krismas hmang tam deuhte tan bik a ni mahna. Nu leh pa te thawhchhuah la ring tan chuan bank account neih hi thil la harsa tak a ni. I bialpa kha i ringtawka, in induhtawk viau a nih pawhin, i sum leh pai chauh it-a ngaizawng che pawh a ni thei tih hria la, bank account i nei a nih pawhin hrilh kher kha i bat a ni lo. Inneih hnuah intawm atan khek hrih rawh.