Jan. 23 ah Toyota Hilux tlangzarh dawn, book theih
India ramin a nghahhleh em em, khawvel huapa lifestyle pick up lar leh tha em em Toyota Hilux chu ramchhungah tun thla ni 23-ah tlangzarh a ni dawn ta a, tunah hian Rs. 50,000 atanga Rs. Nuai 2 inkar chawiin, Toyota dealership hrang hrangah a book theih tawh a ni.
Hilux-ah eng nge kan hmuh dawn?
Sawi tawh thin angin Hilux hi IMV-2 platform nghahchhana duan a ni a. Hei hi Innova Crysta leh Fortuner te pawhin a hman mek ang a ni. Hei bakah hian Fortuner-a mi ang, a khawl, gearbox, four wheel drive system leh suspension te pawh a tawm ve vek dawn a ni. A lirthei len zawng tur hi a sei lam 5285mm leh a wheelbase 3085mm a ni dawn a. Kan lo hriat atan Fortuner hi 4795mm a thui a ni.
Beisei danin Toyota Hilux hian Fortuner-in a hman mek 204hp power pechhuak thei, 2.8 litre diesel khawl, four wheel drive system awm tel a hman hmel a. A gearbox tur hi chiang takin a chiah chiah hriat theih a la ni lo thung a ni. He khawl hian 500Nm peak torque lai mai a pechhuak thei dawn a, hei hian a lirthei chak that tur zia
pawh a pholang chiang awm e. Toyota Hilux man tur hi a la hriat theih loh na a, a man tlawm ho chu a chhuah tirhah hian lirthei leitu tam tak hip thei turin man to lutuk loa an tihchhuah beisei a ni.
A lirthei chhung leh pawn
Toyota Hilux hi India ramah chuan double cap body style in an tihchhuak dawn a. A hmalam bawr hi Toyota Fortuner chhuak mek nen eng emaw chenah a landan a a inzul dawn a, hetihrual hian Hilux-ah chuan hexagonal grille lian tha tak a nei ang a, swept back headlamp design mawi tak, LED ni bawk a nei dawn a ni. A bumper pawh hi Fortuner aiin a danglam bawk ang. A hnung lam bawr erawh chu tunlaia lifestyle pick up truck kan hmuh te nen a inzul tlangpui a ni.
A chhunglamah chuan Fortuner nen a inang viau dawn a, Fortuner in a neih ang technology hmanraw changkang hrang hrang chu Hilux pawh hian a ring ve dawn tlangpui niin a lang a, a dash board, steering wheel leh seat design te chu a inang tlangpui dawn bawk a ni.
A chhungah hian kentel hrang hrang zingah 8.0 inch touchscreen infotainment system, android auto leh apple car play awm tel te a nei dawn a ni. India rama tlangzarh tur Hilux in a kentel tur hrang hrang chu chiang leh kimchang zawkin kan hre thuai turah beisei ila a tha awm e.
A elpui tur leh a man tur
Tun dinhmunah chuan kan lo tarlan thin tawh angin Toyota Hilux hian India rama lifestyle pick up truck chhuak mek awmchhuna sawi theih, Isuzu D-Max chauh hi direct taka a el tur awmchhun a nih hmel a. Isuzu D-Max hi tunah hian India ramah Rs. Nuai 18.05 atanga 25.60 (ex-showroom) man a ni mek a, Hilux man tur hi puanzar a la ni lo na a, Rs. Nuai 30 man bawr vel a ni turah beisei a ni a, chiang takin company in an puangzar
thuai tawh dawn a, nghah leh phawt mai a ngai dawn a ni.
Khawvel huapa lar Hilux
Toyota Hilux hi khawvel puma lifestyle pick up truck lar leh lei hlawh a ni a. Offroading lama tui te, hla tak tak kawng chhengchhe tak taka zin (overlanding) atan tea hman nasat a ni bawk.
Hei bakah hian tlawmngai pawl lian ho khawvel hmun hnuaihnung leh tlaberh deuha mipuite tana thawk tute pawhin an hman tam tak mai lirthei a ni bawk. Pick up truck tha leh changkang bawk India ramin a nei tur hi thil lawmawm tak a ni a. Mizoramah pawh Toyota dealer an la awm lo naa Fortuner leh Innova kan neih nual danah neih a harsa dawn lo niin a lang.