Aizawl: Mizoram luhka, Vairengte leh Bairabiah khualzinte Covid-19 test mek niin, luhka hmun dangah pawh test neih a nih theih nan Kolasib district thuneituten Mizoram sorkarah dilna an siam.
Kolasib district hi state pawn atanga Mizoram luhkna a nih avangin Vairengte leh Bairabiah chuan Covid-19 test hi kalpui reng a ni a, hetihlai hian luhka hmun dangah chuan test hi neih a ni tawh lo.
Tun hnaiah Mizoram hmun hrang hrangah Covid-19 leng a pun leh tak deuh avangin fimkhur leh zual a ngai a ni tiin, nimin khan Kolasib Bawrhsap Dr H Lalthlangliana leh health lam thuneituten inter state ramri luhka a hma lak dan tur an sawi.
Vairengte leh Bairabi bakah Phaisen leh Saiphai luhkaah pawh test hi kalpui leh a nih theih nan ruahmanna siamin, heng hmuna duty tur hian district chhunga thawktu awmsa an indaih dawn loh avangin, Mizoram sorkar thuneitute hnenah thawktu tur an dil belh dawn a ni.