India ram chuan Covid-19 kai an pun chak leh mek laiin ngaih pawimawh bikte hnenah invenna damdawi tihchakna tur (booster dose) pek a kalpui leh tan ta.
Booster dose hi damdawi ina thawk, hri leng beihnaa a hmatawnga tang leh kum 60 chin chung lam, natna benvawn neite hnenah an pe tan.
India-ah hian Covid kai an pung chak leh thar mek a, hei hi Omicron variant veng ni ngeia ngaih a ni.
Ram danga zirchianna neih tawh chinah chuan booster vaccine lak hian Omicron lakah mi a veng thei nia hriat a ni.
Covid-19 hri zinga a chi thar, inkai awlsam em em mai, Omicron variant an tih hi nikum November khan South Africa-ah hmuh chhuah a ni.
Hri thar hmuh a nih hnuah hian ram tam tak chuan booster programme kalpuiin invenna lak hun inkar an tizimin hma an la zui nghal.
India-ah hian booster dose an tih, Prime Minister Narendra Modi-a’n ‘precaution dose’ tia a sawi hi dose khatna leh hnihnaa damdawi hman ngai zel an pe dawn.
India-ah hian tual chhunga an siam vaccine pahnih, Covishield leh Covaxin hmangin January, 2021 atang khan invenna pek beihpui hi an thlak tan.
Darkar 24 liam ta chhung khan India-ah hian hri kai mi 1,79,000 chuang hmun niin khawpui lian hrang hrangah a kai an pung chak hle a. Khawpui ber, Delhi leh sumdawnna hmunpui, Mumbai khawpuite chu a kai pun chak zualna a ni.
Pathianni khan Modi-a chuan hri lenga an dinhmun hi sawipuiin sorkar hotu liante a kawm a, hri kai hmuh tamna state-te chu a theih ang anga pui turin a ti.
Modi-a sorkar hian kar hmasa atang khan tleirawl kum 15 leh 18 inkar hnenah invenna a pe tan bawk a. Indian tleirawl 31% chuan dose khatna an la tawh.
Puitling chin zinga 91% chuan dose khat an la tawh hlawm a, 66%-in dose hnih an la tawh.
Invenna la hi tam tawh mah se mi thiamte chuan la la ve lo maktaduai tam tak an la awm a, hengte hi hriselna pan tak tak niin hri an kai leh an thihpui mai hlauhthawnna a lian hle tih an sawi.
Omicron kai pawh India-ah hian an pung mek zel a, mi 4,003 an awm tawh a. Maharashtra chu a kai tam berna niin mi 1,126-in an kai tawh a, Rajasthan (529) leh Delhi (513) ten an dawt.
India hi nikum khan hri leng thawh hnihnain na takin a nuai tawh a; damdawi in, oxygen leh damdawi indaih lohna nasa takin a tibuai a ni.
&&&&&