India-a hri leng thawh thumna kal mekah damdawi ina luh ngai chu Covid-19 kai zinga 5-10% an ni tih sorkar chuan a sawi a. “Damdawi in mamawh zat hi rang taka danglam leh thut thei erawh a ni,” tiin a sawi.
Hri leng thawh hnihaah khan hri kai zinga 20-30% chuan damdawi in luh an ngai nia chhut a ni.
Darkar 24 liam ta chhung khan India-ah hian hri kai mi nuai 1.79 chuang hmuh a ni a, endik zinga 13.29%-in an kai tihna a ni a. Ni 10 emaw chauh liam taah kha chuan ni khata hri kai hmuh hi 10,000-15,000 vel chauh a la ni.
Health ministry chuan, “Hri kai pun chhan hi variant ngaihven ngai, Omicron vang leh ram chhung hmun hrang hrangah ngaihven ngai dang la ni, ‘Delta’ la darh zel vang a ni,” tiin Thawhtanni khan a sawi.
Sorkar chuan state leh union territory tinte chu oxygen pek theihna khum, ICU leh ventilator awm an neih dan vil reng turin a ti a. Covid Care Centre-te pawh a tul a nih chuan oxygen pek theihna tura buatsaih tur leh intern ti lai doctor, nurse leh MBBS zirlaite pawh thawktu indaih lohnaah pawh dan dap turin a ti.
Hri kai pung mek karah Delhi, Maharashtra leh state dang tam tak chuan damdawi in khum an la ngah tawk tih an sawi a, damdawi ina lut an la tam lo niin an sawi.
Thawh hnihnaa miin damdawi in leh oxygen an inchan loh atang khan khawpui lian tam takte chu inzirin hmachhawn dan an thiam tawh tih thuneitute chuan an sawi.