- Mahmuaka Chhakchhuak
Mizo zinga a tam berte chuan 1450 – 1700 AD velah khan Lentlang leh Tiau hmun lam panin Burma (Myanmar) ram an chhuahsan nia hriat a ni a, hetih hunlai vel hi Rev. Liangkhaia chuan sakhuana kan neih tanna bul niin a sawi bawk. Tin, hetih hunlai hian Lushei hoin lal an nei tan nia sawi a ni bawk a. Lal hi engzat chiah nge an neih tih erawh hriat theih ni chiah lo mahsela heng Zo hnahthlak hnam peng hrang hrangte hian thlang rawn tla zelin Mizoram, Tripura, Assam leh Manipur thlengin an in zarpharh a, Kum zabi 16-na lai hawl velah Tiau hi an rawn kan nia hriat a ni. Sailo lal bikte erawh hi chu kum zabi 17-na hnu lam atanga thlang rawn tla anga sawi a ni a, 1740 AD khan Sailo lal pasarihte; Pu Kawlha, Darpuilala, Darliankuala, Lalhluma, Rohnaa, Lalchera leh Thangphungate chuan Selesih sang sarih khua kan tih thin kha an din nia sawi a ni. Anni zingah hian Pu Kawlha hi upa berin hotu chan a chang bawk a. Chutiang a nih lai chuan mizoramah hian mizo nilo hnam dang hi lo awm tawha hriat a ni a, chungte chu tute nge an nih hriat chian a har tawh viau thung nain an sulhnu erawh khawilai hmun hmunah emawte chuan hmuh theihin ala awm thung.
Kum 1780 velah chuan Sailo lalte chu mizo lalte zingah chuan an chungnung berin an lalna khua pawh a lian bera ngaih an ni a. Chuti chung chuan mizo lalte zingah hian hnam dangte hriat khawpa lal ropui leh langsar hi an awm lem lo. Khang hunlaia lalte khan hmathlir thui tak an nei pawhin a rinawm lem loh a, In 300 – 700 vel an nih chuan an duhtawk mai niin a hriat. Hmun khuar nghet tak tak nei loin an pem an pem a, hlauh an ngah thin avangin awmna ngaiah rei tak an awm ngai lo nia hriat a ni. Sailo lal, Lallula fapa naupang ber Vuttaia (1776-1876) ngei pawh kha lal hmingthang tak niin lal rei ber pawh a ni maithei a, a lalna hmun erawh khaw hrang hrang a ni thung; Kum 20 mi vel a nihin Arteah a lal tan a, apa thih veleh Hreichuk a thut nghalin, chuta tang chuan Arthlawr a zuan a, Khumtungah, Hualtuah. Hualtuah phei hi chuan a ropui viau maiin a In pawh a dung lam hlam 100 leh a vang lam hlam 10 lai a ni e an ti nghe nghe. Chuta tang chuan Buanhmun lam zuan lehin East Lungdarah, Puilovah, chuta tangin Rullamah zuan lehin Rullamah hian kum 78 mi vel niin a boral ta nghe nghe a.
Hetianga an pem kualna chhan hi chhan hrang hrang awm theiin a hriat a, anmahni lalte ngei pawhin rorel an thiam loh vang pawh a ni thei bawk ang. Hmelma leh ral laka an khua humhim an duh thin bawk avangin lal tam takte chuan an lalna khua hi an sawn thin ni awm tak bawk a ni. Khawtlang leh ram rorelna zawng zawng chu lalin an pumhmawm vek a, mipui lamin chan engmah an nei lo a, an sawisel thiang hek lo. Lalte chuan an khaw mite chungah an lungawih lohin an lungawih lohnate chu khua atangin an hnawtchhuakin an In leh lote pawh an chhuh vek mai zel thin a. Hei vang hian lal fing deuh khuaah mipui an hlimin an thla a muang a, lal sual deuh khuaah erawh mipui an thla a ngam thin lo.
Tlungvel lal, Lalsavunga fanu Laltheri pawh nula lian zet zawt tak leh hmel tha tak a ni a, an khaw tlangvalte chuan rim chak hle mahsela an rim ngam ngai lo a, nimahsela amah chuan an khaw tlangval zinga hnamchawm tlangval ber kher Chhawnthanga chu a ngaizawng tlat mai si a, a duh em em a, a hmel hmu loin a awm theih ngai siloh avangin a duh hun hunah a koh tir mai thin a. Zu te in dunin midang hriat lohin an inhmu dun ta fo mai a, a tawpah chuan nau alo pai ta hial mai a. Nikhat chu an lo ngampa ve deuh tawh bawk a ni ang a, Laltheri te luhkapuia an awm dun laiin Laltheri pa chuan a chhiahhlawh Lamhawia chu Chhawnthanga a kahhlum tir a, a lu chu tualah an tar bawk a. Laltheri chuan a sun nasa em em a, a at phah dawn hialin an hria a ni. Heta tang hian mizo lal thenkhatte nungchang chu kan hre thei mai awm e. Hetiang hian an lalna khuaah chuan an chunga leng tumah awm loa ngaiin an duh dan danin ro an rel mai a, an duh duh that mahsela tumahin an sawisel ngam ngai hek lo.
Heng bakah hian hlauh an ngah bawk a, huai chi hrang hrang pawh an ngahin – Sih huai, Puk huai, Bung huai, Lungpui huai, Tui huai leh Ramhuai hrim hrimte hi awma an ngaih tlat avangin tihlungawi tumin an inthawi thin. Heng huaite hian thatna thlen loin chhiatna lam thlentu vekah an ngai a, suaksual tak vekah an ngai a ni. Natna leh hrisel lohna an neihin chung huaite thiltihah chuan an ngaiin Puithiam (Bawlpu) hmangin inthawina an hlan thin a, damlo chuan Puithiam hnenah chuan kalin a niin an mar lo deka a chawh apiang hmangin inthawina an hlan thin. Puithiamin a chawhte chu neihloh a rem lo a, an neih loh pawhin an puk mai a, a tlangpuiin Vawk leh Arte hi Puithiam chuan alo chawh thin. Puithiam hi dam lohna lam nilo lo lama huai awma an hriat pawhin inthawi tu bera an neih a ni a, ramhuai hnena thil hlan a tula hlan tu bera an hman a ni.
Ramsa zingah hian Sakei hi an hlauh ber a ni a, a hming pawha sawi ngam loin ‘Sapui’ an ti kher thin. Sakei zingah hian ransa leh mihring seh ching alo awmin sakei zawng zawng chu sa seh hmanga an ngaih tawh thin avangin an hlau thei em em a. Sapui laka invenna atan Fei leh Chem bak an neih loh avangin an khuaa Pasalthate chu an thlamuanpui thin hle. Heng bakah hian ‘Hri’ hi an hlau thin hle bawk a, damdawi lamah an la hniam bawk si avangin natna hi khawilai huai emaw avanga lo thlengah an ngai mai thin avangin an inthawi fo thin a, a chang chuan an inthawina avang chuan dam pawh an awm bawk a. Hri danna atan kawtchhuahah hri dai an theu a, ramhuai hlauh atan mai feite an thiat fur bawk thin. Nimahsela chungte chuan awmzia a awm tak tak chuang lo a, hriin mi thahnemtham tak a tihhlum ni ngeia hriat ruhro pawh hmuh tur a awm thin hi.
Hetianga kan pi leh pute khan hlauh an lo ngah thin avang hian vawiin thleng hian mi thenkhatte thisenah chuan la bet ni pawhin a hriat a. Chanchintha engin nasa taka kan ram a luhchhuah tawh hnuah pawh hlauhna thlarauin a man beh tlat mi hi an la awm ni awm tak a ni. Heng vangte hian kan hmasawn tur ang pawhin hma kan sawn thei loin kan changkang thei lo ni pawhin a hriat. Amaherawhchu Pathianthu avang zawkin zawi zawiin hma kan lo sawn chho hret hret a, tunah chuan khawvel hnam dangte zingah pawh hnuaihnung lutukah kan awm bik tawh loin kawng hrang hrangah pawh rual pawl phahin kan lo awm ve ta reng mai.