Indian police-te chuan nikuma online-a Muslim hmeichhe 80 chuang tar chhuaka zuarna app siamtu ni ngeia hriat an man.
Sulli Deals app hi web platform GitHub atanga July, 2021-a tihchhuah a ni.
Kum 25 mi hi hetiang deuh bawka Muslim hmeichhia 100 chuang zawrhna app dang, Bulli Bai a irh chhuah hnu lawkah man a ni.
Mi pali, zirlai kum 21 mi telin Bulli Bai app siam kaihhnawihah hian man an ni tawh.
Heng thil pahnihah hian hmeichhiate hi zawrh tak tak an ni lo va; mahse, Muslim hmeichhiate hnuaichhiahna leh deuna atana tih a ni a. A bik takin Prime Minister Narendra Modi-a kaihhruai Hindu la run tak pawl sawi chhe nasate zawrh an ni.
‘Sulli’ hi Hindi niin Hindu kal firfiakten Muslim hmeichhiate an koh duhdahna niin ‘bulli’ hi mipat hmeichhiatna lam tawngkam a ni thung.
Bulli Bai app a chhuah tirh khan nasa taka sawisel a hlawh a. A thlalak an tar lan pakhat phei chuan July thla khan Delhi police-ah a thlen a; mahse, tun hnai lawk thleng khan hma lakna a awm lo tih a sawi.
Pathianni khan police chuan Indore, Madhya Pradesh-ah Aumkareshwar Thakur an man ta a ni.
Police-te chuan Thakur-a hi Bulli Bai siamtu an man, Neeraj Bishnoi-a’n a sawi atangin an man tih an sawi.
Delhi Police hnuaia cyber crime deputy commissioner KPS Malhotra chuan Thakur-a hmanruate an endik tih a sawi.
Sulli Deals app-ah hian hmeichhiate hi an nihna leh thlalak nen tar lan niin ‘deals of the day’ tia zawrh an ni.
App-a an dahte hi Muslim hmeichhe langsar tak tak – chanchinbumi, activist, artist leh researcher te pawh an tel.
An zawrh zinga tel commercial pilot chuan July thla khan he thil a hriat hian hrehawm taka a awm thu a sawi.
Bulli Bai app pawh hi Sulli Deals ang bawkin an phalna la hmasa lovin Muslim hmeichhiate thlalak daha zawrhna a ni.
2018 Amnesty International report-a tar lan dan chuan India-ah hian hetianga hmeichhia tih hi a tam hle a, a bikin sakhua leh hnam tlem zawkten an tuar nasa.
Muslim hmeichhiate deusawhna ang chi hi tun hnaia politics-a Hindu kulmuk an len hnuah a nasa zual niin mi thiamte chuan an sawi.