United States pa chu vawk lung, mihringin an hman theih tura tihdanglam hmanga a lung thlak hmasak ber a ni ta.
Kum 57 mi, David Bennett-a hi Baltimore-a darkar sarih zet a lung thlaka an buaipui hnu ni thumah tha takin a harh chhuak tih doctor-te chuan an sawi.
Vawk lung nena a lung thlak hi Bennett-a nun chhan theihna awm chhun a ni a; mahse, eng chen nge a dampui theih dawn tih erawh hriat a ni lo.
Thlak tura an zai hma ni chiah khan, “Thih nge thlak tih bak duhthlan tur a awm lo,” tiin Bennett-a hian a sawi.
“Thim zinga silai kah ang chauh ni mah se a bak duhthlan tur ka nei tawh lo,” a ti bawk.
Bennett-a dinhmun thlir chungin he thil puitham tak mai ti tur hian US-a damdawi lam thuneitu (medical regulator) chuan University of Maryland Medical Center-a doctor-te chu phalna an pe.
Lung natna danglam tak nei Bennett-a lung thlaksak bak chu atan dam chhuahna a awm lo.
A lung thar atana an hman vawk hi a hmain a gene tam tak tihdanglam (modify)-in an ruahman lawk hmasa niin AFP news agency chuan a tar lang.
Medical team hian he thil puitlin tur hian kum tam tak chhung zirchianna an lo nei tawh a, an hlawhtlin theih tak avang hian mihring dam nana rahbi thar pawh a nih theih beisei a ni.
Surgeon Bartley Griffith chuan an hlawhtlinna chuan khawvelin taksa penga harsatna a neih chu rahbi pakhatin a tifel ta niin a sawi a. US-ah hian ni tin mi 17 vel taksa peng thlak ngai an awm a, mi 1,00,000 vel thlak ngai hmabak an awm reng bawk.