Chief minister hovin hri leng din-hmun leh hmalak zel dan tur sawiho


Nimin khan Chief Minister Zoramthanga hoin Assembly Annexe Conference Hall-ah tlawmngai pawl hrang hrang leh political party aiawhten Mizorama hri leng hluar mek leh Omicron lo lut mai thei dinhmuna a din avanga hmalak zel dan tur chungchang an sawiho.
He inrawnkhawmna kaihruaitu chief minister chuan Covid-19 hri thar Omicron-in khawvel a tibuai mek a, India ram khawpui hrang hrangah inkhuahkhirhna an kalpui leh mek tih a sawi a, hri leng laka Mizoram a him zel theih nan sorkar chuan a tih tur, tha nia a hriatte chu a tih zel tur thu a sawi.
Zoramthanga chuan hri leng dona kawngah sorkar, kohhran, NGO leh mipuite zinga thawhhona tha tak a lo awm tawh thu sawiin, “Tunah pawh hian thawhhona tha tak nen he hri leng hi hmachhawn zui zel turin mipui ka sawm a ni,” a ti.
Inrawnkhawmnaah hian Mizorama political party hrang hrang, NGO leh kohhran, AMC, local council leh village council aiawh, hospital leh medical association aiawhte an tel a. Thutkhawmnaa tel a tam zawkin state pawn atanga lo lutte endik khauh taka kalpui an duh thu an sawi hlawm.
Inrawnkhawmnaa tel atanga rawtna hrang hrang lutte chu Covid-19 SOP rualkhai taka district tina kalpui te, tha zawka mask vuah tura inzirtir leh hri leng chungchanga mipui hriat tur leh inhrilhfiah ngaite inhrilhhriatna ngawrh zawka kalpui te, test ngawrh zawka kalpui a tel a ni.
Health department hotuten Krismas leh kum thar vuakvetah khan symptom nei, in-test si lo an awm chu hri kai pun chhan pakhat nia an rin thu an sawi bawk.
Inrawnkhawmnaah hian Assembly Speaker Lalrinliana Sailo, Health Minister Dr R Lalthangliana, Home Minister Lalchamliana, I&PR Minister Lalruatkima, Health & Family Welfare Board Vice-chairman Dr ZR Thiamsanga te an tel a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427