KTP General Conference lo awm turah khawmpui palaite chu Covid-19 an kai leh kai loh endik vek an ni dawn.
Kumin KTP General Conference hi Kolasib-ah nghah a ni. Hri leng kara he khawmpui kalpui dan turte nimin khan Kolasib Bawrhsap Dr H Lalthlangliana hoa sawi ho a ni a. He inkhawmpui neih turah hian palai beisei zat turte, thlenna tur bakah ei leh in buatsaih dan tur zirchianna neih a tul thu sawi a ni.
DC Conference Hall, Kolasib-ah thutkhawmah hian, KTP General Conference lo awm tura palaite chu Covid-19 an kai leh kai loh endik vek tur an nih thu te sawi a ni a. Ram puma hri kai awm dan azirin, ruahman sa anga hlawhtling taka kalpui nise tih a nih rualin hripui laka mipui himna ngaihtuah chungin a hunte pawh sawn a ngaih theih thute sawi a ni bawk.
Kolasib Bawrhsap hian Central KTP hruaitute chu sorkar inkaihhruaina leh mipuite himna ngai pawimawh chunga inbuatsaihna kalpui turin a chah nghal.
Nimina thutkhawma tar lan a nih danin, Kolasib district bikah hian tun dinhmunah hri kai enkawl lai mi 96 an awm mek a. Ni 10 liam ta chhung khan hri kai endik atanga kai thar hmu chhuah chu za zelah 1.98 a ni.