Aizawl: Health Minister Dr R Lalthangliana chuan Mizoramah Omicron kai an la awm lo nia an hriat thu sawiin, tunah hian an awm leh awm loh hriat nana NIBMG-a sample 90 an thawn result chu ngaihchan mek a nih thu a sawi.
Nimina Assembly annexe-a Mizorama Covid-19 leng dinhmun leh hmalak zui dan tur sawihonaah health minister chuan Mizorama hri kai zingah Omicron kai an awm leh awm loh hriat nan National Insitute of Bio-medical Genome (NIBMG), Kolkata hi kai sample endik thin a nih thu a sawi.
Health minister chuan, “Sample 400 kan thawn tawh a, heng sample-ah hian Omicron hmuh a ni lo a, tunah hian IBMG-a endik turin sample 90 kan thawn leh mek a, a result ngaihchan mek a ni,” a ti.
Zoram Medical College-a Covid-19 variant hrang hrang finfiah theihna, Genome Sequencing Laboratory chu hman theih a la ni lo a, trial run an tih mek thu Dr Thangtea chuan sawiin, a taka hmang thei turin ICMR pawmpuina an nghah mek thu leh hman theih a nih hunah chuan Mizorama Covid 19 kaiten eng hri ber nge an kai tih a hriat theih zung zung tawh dawn tih asawi.
Health minister chuan Mizoram chhunga hri kai enkawlna hmun hrang hrang dinhmunte a sawi a, dedicated covid hospital, ZMC-ah khum 268 a awm mek a, khum 36 awmna ward chu Omicron veite tana dah lawk a nih thu a sawi a; district hrang hranga Dedicated Covid Health Centre (DCHC) 20 awmah khum 331 a awm tih a sawi.
Covid Care Centre (3C) leh Community Covid Care Centre (4C) awm zawt pawh sawiin, Mizoramah mi 2,904 enkawl theihna 3C 71 a awm mek thu leh 4C 433, mi 11,782 len theihna a awm mek thu a sawi bawk.