Bollywood-a director ni tura anga Bengali actress pakhat thlem chhuak a, a thlalak sexy tak latu nia sawi kum 24 mi chu Mumbai police-in an man. He pa hian a thlalak hi mipui hmuh theih tura theh darhah a vau a ni.
Om Prakash Tiwari (24) hian tunhma lam pawh khan heti ang deuha khawsak a lo ching tawh a, tun tum pawh hi a vawikhatna ni lovin, vawi tam heti anga che thin niin, police- in an sawi.
Kum lama la naupang deuh te leh film lama inlan tuma bur te veh thlemin, an thlak a laksak thin a, Netflix series-a an lang thei dawn nia sâwmin, a hnu deuh maiah an thlalak te theh darh chiamah a vau zui thin a ni.
Tihdan ngai bawk!
Tun tumah pawh hian Facebook kaltlangin December 2021 khan Bengali actress hi be pawpin, Mumbai-a zin turin a chah thla a, hetah hian thlalak sexy thei ang bera laksakin, audition chhuanlamah a siam hnu ah a tihdan ngai bawkin thlalak thehdarh sakah a vau leh ta a ni.
Bengali actress hi Kolkalta a cheng a ni a, Bengali movies thahnem taka inlan tawh a ni nghe nghe. Netflix series-a inlan theih ngei beiseina nena Mumbai-a thlawk thla a ni a, a tifuh lem lo hle.
He nu hian Malad police-ah thubuai theh lutin, Tiwari hi IPC 345A leh 67A hnuaiah hlin a ni a, thubuai thehluh atanga darkar 48 chhungin police te hian an man. Tunah hian a chet tawh dan te uluk taka chhui zui mek niin, thil awmdan chiang taka a lo lan thuai beisei a ni.