Mizoram pawn atanga khualzin thleng hlimte Lengpui Airport-ah Covid-19 kai leh kai loh endik chhunzawm zel an nih laiin, tun dinhmunah Saiphai, Phaisen leh Saihapui V-ah te RAT test kalpui mumal a ni lo.
January 6, 2022 khan Mizoram pawn atanga khualzin thleng hlimte chu Covid-19 leng kara himna tura dan (SOP) chu Mizoram sorkarin a tihdanglam angin SOP thar angin Lengpui Airport-a thleng hlimte chu sorkarin a pawm china RT-PCR test-a negative result neite tih loh chu RAT hmanga endik chhunzawm zel an ni.
Nimina Lengpui Airport-a flight pathum awmah khualzin mi 161-te endik an ni a, heng atangin Covid-19 hri kai mi 30 hmuhchhuah an nih thu, Dr Elsa Lalramzauvi, Medical Officer i/c Lengpui Airport-in The Zozam Times a hrilh.
Dr Elsa Lalramzauvi sawi danin, Lengpui Airport-a khualzin lutte hi a tam zawk chu India khua leh tui nihna nei an ni a. Foreigner erawh awm pheuh pheuh chauhin, an zingah hian hri kai hmuh chhuah an awm ngai mang lo a ni.
Hetih lai hian sorkarin state pawn atanga Mizorama lo lutte hri an kai leh kai loh endik tura tura SOP a tihchhuah hnuah, Vairengte Screening point-ah pawh RAT test kalpui chhunzawm zel a ni a. Chhinchhiah a nih danin, Vairengte Screening Point-ah hian mi 1,27,371 endik ni tawhin, heng atangin hri kai mi 1,149 hmuhchhuah an ni tawh.
January 11, 2022 tlai dar 5 atanga nimin zing dar 5 thleng khan Vairengte kaltlanga state pawn atanga Mizoram lo lut mi 145-te RAT hmanga endik an ni a, heng zingah hian mi pakhat chiah hri kai hmuh a ni. “Vairengte Screening point-ah hian test kalpui reng ni mah se, tun hnaiah hri kai hmuh lo ni pawh ni eng emaw a awm,” thudawnna chuan a ti.
The Zozam Times thu dawn danin Kolasib district chhung Vairengte leh Bairabi-ah hian chhun zan zawma test hi kalpui a ni a. Heng luhka pahnih bakah Saiphai, Phaisen leh Saihapui V-ah thuneituten state pawn atanga lo lutte endik hna kalpui turin hma an la a. Amaherawhchu, tun dinhmunah thawktu indaih lohna avangin RAT hi mumal taka kalpui a ni lo thung.
Kolasib district chhung Vairengte leh Bairabi baka luhka dang – Saiphai, Phaisen leh Saihapui V-ah test kalpui a nih theih nan ruahmanna siamin thuneitu sang zawkah dilna hi thehluh a ni tawh nia thudawn a ni.
/////////////////