Sorkar laipui atanga sum an dawnte chu Assam chuan a tangkai tur ang leh a nihna ang tur takin an hmang tha tawk lo.
Assam Chief Minister Himanta Biswa Sarma chuan sorkar laipui sum hmuh an hman tangkai tawk loh thu hi a sawi.
Chief Minister Sarma chuan sorkar laipuiin state hnena scheme hrang hrang atana fund a pekte chu a vaiin an hmang lo va, hei hi thawktute inthlahdah leh hlemhlet vang niin a sawi.
Assam chief minister hian he thu hi sorkar department hrang hranga thawk tur lak thar mi 546 hnena apointment letter sem inkhawmah a sawi.
Sarma chuan hna thar neite chu sorkar kalphung leh inrelbawlnaah hna thawh dan hmang thlak danglamtu ni turin a fuih.
Scheme hrang hrang tana Assam-in sum an hmuhte chu thawktuten rim taka thawh an peih loh thin avangin a nih tur ang taka hman a nih loh phah thin niin a sawi.
“Tun hma hun kal tawh tam takah khan sorkar laipui atanga hmasawnna thlen thei tur scheme hrang hrang atana fund kan hmuhte hi a thawktu thuneitute inthlahdah avangin a nihna tur ang takin kan lo hmang lo tawh thin a ni,” a ti.
Chief Minister Sarma-a’n Nilainia sorkar hnathawk tura lak thar hnena appointment letter a pek zingah hian Tokyo Olympics 2020-a medallist Lovlina Borgohain pawh telin deputy superintendent of police (DSP) a ni dawn.
Chief minister hian hna thar a nei tih tar lanna lehkha hi state secretariat (Janata Bhawan)-a inkhawm neihah hian mi dangte rualin a hlan a. Assam police DG Bhaskar Jyoti Mahanta leh Chief Secretary Jishnu Baruah ten an telpui bawk.
Borgohain-i hi nikuma Tokyo, Japan-a neih, Olympic Games 2020-ah khan boxing-ah India tan welterweight huangah bronze medal a hlawh chhuak a. Olympics-ah Indian zinga boxing-a medal la phak pathumna a ni.
2018 AIBA Women’s World Boxing Championships-ah leh 2019 AIBA Women’s World Boxing Championships-ah bronze medal a lo la tawh a. 1st India Open International Boxing Tournament-ah gold leh 2nd India Open International Boxing Tournament-ah silver a lo la tawh bawk.