Department of Information & Public Relations (DIPR) leh Mizoram Journalists’ Association (MJA) member-te nimin khan kum thar inhlan tharna hun an hmang.
DIPR Auditorium-a hun hmanah DIPR Director Lallianpuii chuan thu sawiin, MJA leh DIPR-a thawkte chu tum thuhmun neia hnathawk, hman atanga vawiin thlenga inhnehnai leh thawkho an nihna chu ngaiah nei mai loa, a pawimawhzia leh hlutzia hre thar turin kalkhawm te chahin, “Press mite leh DIPR hnathawh chuan a thleng thui a, vawiin atan chauh ni lo, nakin hun lo la awm zel tur thlengin mite hnenah thu a sawi thin a ni,” a ti.
Sorkar leh mipui tana rawngbawl hna hlawk tak an thawk tih hrechiang a, hma lam pana theihtawp chhuah turin leh, thalaite talent hai chhuahna leh eizawnna siamsak kawnga pawimawh – film, art leh photography chawi lar a, chawisang turin MJA te chu thawhhopuiah DIPR Director hian a sawm nghal bawk.
MJA President Zonunsanga Khiangte pawhin, IPR Department-in MJA te hamthatna tura hma an lak tawhna leh tun thlenga hma an lak zel chungchangah lawmthu a sawi a. An welfare atana hma an lakna kawngah Journalist Pension Scheme an ngaih pawimawhzia sawiin, tan lakpui turin department hotute a ngen a ni.
Zonunsanga Khiangte chuan journalist-te leh DIPR mi leh saten ram tana an hmalakna tam tak zingah chi leh chi, hnam leh hnam inkara inpumkhatna ‘communal harmony’ pawimawhzia a sawi lang a. Hemi kawngah hian sorkar kaihhruaina hnuaiah nasa lehzuala hmalak tul a tih thu a sawi bawk.
He hun hi I&PR Deputy Director PB Lianthangpuii’n a kaihhruai a. Thusawi hrang hrang ngaihthlak a nih hnuah I&PR Deputy Director Andrew H.Lalremruata’n lawmthu sawiin hun hnung a khar a ni.