Central YMA hruaitute chuan Vairengte daia Mizoram leh Assam ramri hrula Mizo huan neituten hmunphiah an seng theihna tura hma la turin chief minister an ngen.
Central YMA hruaitute hian nimin khan chief minister hi a pisaah an hmu a, Vairengte leh Aitlang hmuna Mizo huan neiten an thlai thar seng an tumna kawnga Assam police laka harsatna an tawh chungchang chu Central YMA hian sawi chhuak a, Mizo huan neituten hmunphiah an seng theihna tura hma la turin an ngen.
Chief minister chuan Central YMA ngenna angin Vairengte leh Aitlanga Mizo hmunphiah huan neite harsatna chu a lo ngaihven zui tur thu leh theihtawp a chhuah tur thu a sawi.
Central YMA leh PWD ten MoU ziaka an thawhdunna kal zelah PMGSY hmanga kawngpui laihte uluk taka vil a, a tha thei ang bera kalpui zel a tul thu Zoramthanga chuan a sawi a. Kawngpui tha neih theihna tura theihtawp chhuaha YMA nena tanlak zel a tul thu a sawi.
Khawchhak atanga kuhva phurh luh chu dan lova sumdawnna a nih thu a sawi a, titawp tura theihtawp chhuah a tul thu leh sorkar laipuiah pawh theihtawp chhuah a tum thu a sawi a. Hemi kawnga Champhai DC hmalakna tha a tih thu YMA hruaitute hi a lo hrilh bawk.