Indian court chuan kum 2014 leh 2016 inkara sakhuana avanga inserh hrang hmeichhia (nun) pawngsualtua puh bishop chu thiam a chantir.
Kum 54 mi, Franco Mulakkal hi Kerala-ah kum 2018 khan man niin an puhnaah a pha.
Nun hian a thil tawn a thlente Catholic Church-in an ngaihsak lo nia a sawi avangin he thubuai hian mi a tithinrimin sawi a hlawh hle.
Vatican chuan bishop hi rawngbawlna atangin a chawlhtir lailawk.
Zirtawpni khan Kottayam khawpuia court chuan an puhnaah thiam a chantir.
Kottayam Additional Sessions Judge (ASJ) G Gopakumar chuan, “An uhna hi a ti ngei tih finfiahna a awm lo,” a ti.
Nun aiawha ding dan hre mite chuan high court-ah an thlen leh dawn tih an sawi a. Bishop aiawha dangte erawh chuan finfiahna engmah a awm thei dawn chuang lo niin an sawi.
“Thubuai ngaihnawm tak a ni a, high court lam hawi leh mek a ni a, a tha vek e,” tiin Mulakkal-a aiawha dingte hotu, Raman Pillai chuan a sawi.
“Court-in a thiam lohna a hmu lo va, a puhtuten finfiahna leh thuhretu an neihte chu a pawm lo tih a chiang a, hei hian an puhna hi a dik lo tih a tilang a, inpawngsualna engmah a awm lo a ni,” a ti.
Mulakkal-a hi Punjab-a Jalandhar diocese-ah bishop a ni a. A puhtu hi Kerala-a Missionaries of Jesus-a mi niin Jalandhar diocese huam chhunga mi tho a ni.
Bishop hian vawi 13 a pawngsual a, Kottayam-a an awmna (convent)-ah pawh tharum nen a bei niin a sawi.
Vatican-ah pawh lehkha thawnin kum 2018 khan Delhi-a Pope aiawh hnenah pawh open letter a thawn a, hei hi vawi li lehkha a thawnna niin a sawi bawk.
Vawi li zet hrilh hnuah pawh ngaihven a hlawh lo nia a sawi avang hian nun leh activist rualten duh lohna nasa tak an lantir.
Nun tam tak chuan Kerala bakah Vatican thuneitute chuan pawngsualna thleng hi a hre lo der niin an puh.
Duh lohna lantirnaah hian nun tam tak chuan vauna tam tak an lo tawng tawh thin niin an sawi a. Heng zingah hian disciplinary warning, sawn leh congregation atanga sawn thlengin vau an ni thin niin an sawi.
Zirtawpnia thutlukna puan a nih pawhin mak ti leh thinrim an tam hle.
“Kristiante chunga thleng hi a rapthlak!” tiin bishop duh lohna lantirnaa hotu pakhat, Sister Lucy Kalapura chuan a sawi a. Ani hi kum 2019 khan Kerala-a Franciscan Clarist Congregation (FCC) atanga hnawh chhuah a ni.
FCC erawh chuan Sister Lucy-i an hnawh chhuah chhan hi a nunphngin dan a bawhpelh vang niin a sawi a. Amah erawh chuan hei hi phain duh loh lantirnaa a tel vang chauh niin a sawi thung.
“Hei hi hmeichhe pakhat tan chauh a ni lo va, nun tam takte tan a ni a. Kan dam chhungin kan bei dawn a, dikna a tlu ngai lo,” a ti.