India rama chak taka Covid-19 kai an pun mek laiin Hindu sang tam tak chu Prayagraj (tun hmaa Allahabad), Uttar Pradesh-ah an kûtpui hmangin an pungkhawm.
Hindu-te hi Makar Sankranti hmanga pung khawm niin Ganges-a an inbual chuan an sualna tleng faiah an inngai.
Hetianga pun khawmna ang hi India-a hri leng thawh hnihna thlen chhan lian taka puh a ni.
Uttar Pradesh thuneitute chuan Prayagraj-a kumina kût hman hi a khap duh lo thung.
Zirtawpnia TV-a video tihchhuahah chuan lui lamah mi tam tak an tawngtai a, inhlatin an awm lem lo. Hindi news channel ABP chuan a kal 70% vel zetin hmai an tuam lo bawk niin a puang.
Lui kamah hian pung khawmte awmna turin puan in kaih lawk a ni a, thuneitute chuan mipuite vil tur hian police 5,000 chuang an dah.
Chief Minister Yogi Adityanath chuan mipuite chu Covid-19 dan zam zawm turin mipuite chu a ngen bawk.
Sorkarin ngen mah se Magh Mela an tih bawk an hmanna hmunah hian tan tak tak hma pawhin hri kai hmuh an ni tawh.
Police hotu, Rajeev Narayan Mishra chuan Ningani khan police duty 38 pawhin an kai tih sawiin pun khawm awm tur hian hri a tihdarh a hlauhawm thu a sawi bawk.
Uttar Pradesh-ah hian hri kai an pung chak hle a, Prayagraj-ah pawh hian kar hmasaa mi 92 chauh ni khata kai chu a let 10 zeta pungin mi 1,267-in an kai.
Thuneitute chuan inkhuahkhirhna puangin zan lam a curfew a. Election Commission chuan thla thara inthlan tura vantlang inkhawm huaihawt a khap rih bawk.
Ningani khan mi tam tak chuan Prayagraj hi an pan tih chanchinbu tam takin an tar lang a. |henkhat chu tractor leh truck tawh takah te an chuang hlawm.
Thuneitute chuan a hmunah hian Covid-19 inkaihhruaina zam vek turin an ti tih an sawi.
A kalte hi vaccine an la tih leh an thlen hma ni hnihah RT-PCR hmangin hri an kai tih a chianna tilang turin an ti bawk.
“Hmun tam takah hriattirna kan tar a. Screening team tam tak dah a ni a, inendikna dah a ni bawk,” tiin health officer in-charge Jai Kishan chuan NDTV a hrilh.
Adityanath-a chuan Ningani khan Covid-19 kaite leh invenna bikim la lote chu kal lo turin a ngen.
Mi thiamte erawh chuan a kal zawng zawng endik tur chuan tihngaihna a awm loh thu leh ni reilo te hnuah hri a darh phah dawn niin an sawi.
Nikum April thla khan Himalaya tlangdunga Uttarakhand-a Haridwar-ah sakhaw kûtpui pawimawh, Kumbh Mela hmangin mi maktaduai tel an pungkhawm a, hetih lai hian ram chhung hmun danga oxygen leh damdawi in khum indaih lohna nasa tak a thleng.
Ram chhung hmun hrang hrang atanga kalkhawmte zinga tam tak chu an haw hnuah hri an kai tih hriat an ni a. Epidemiologist-te chuan he kût hi hri kui tiahna hmun niin an sawi.
Kuminah hian Uttarakhand sorkar chuan lui dunga kût hmanga pun khawm a phal tawh lo.
Uttar Pradesh-in Magh Mela a thleng hi vantlang hriselna dinhmun tiderthawngtuah mi thiamte chuan an ngai.
India hi hri leng thawh thumna tawng mekin Omicron variant vang ni ngeia ngaih a ni.