Champhai district chhunga tlawmngai pawl hrang hrangin Champhai Bawrhsap Maria CT Zuali transfer order chu January 18 ral hmaa sut turin Mizoram sorkar an phut a, sorkar order tihchhuah an pawm lo tih lantir nan order copy an hal.
Sorkarin Champhai bawrhsap a sawn chungchang ngaihtuaha nimina Champhai district-a tlawmngai pawl hrang hrang pariat aiawhte thukhawm chuan Maria CT Zuali’n Ministry of Home Affairs thuchhuak bawhzuia ramri hrula dan ang taka hma a lakna ngaih theih loh avanga chawpchilh taka sawn chhuah a ni chu tha an ti lo a, sorkar hmalakna chu na takin an dodal a, bawrhsap chhuak tur dang turin a tul dan zela hmalak nise an ti.
Tlawmngai pawl hrang hrang thukhawm hian resolution siamin transfer order chu January 18 ral hma ngeia sut turin sorkar an phut a, an hun tiam a ral hnuah sorkar hmalakna a la awm lo a nih chuan hmalak zel dan tura ruahmanna an siam anga kal an tum.
Dan leh thupek dik taka kengkawha dik taka roreltu, Maria CT Zuali chu an district-in a mamawh lai taka Champhai a chhuahsan chu an rem ti lo tihte an resolution-ah hian an tar lang.
An thutkhawm zawhah The Zozam Times-in Champhai NGO coordination Chairman Lalnunmawia a biaknaah an DC chu chhuahtir loh an tum thu a sawi a, “A tawp thlengin kan tang dawn a. Hetianga sorkarin a transfer ringawt mai hi kan ngaihthiam thei lo. Kuhva sumdawnna a inhnamhnawih hi zaa sawm pawh an awm lo. Mipui hi kan tangrual zel dawn,” a ti.
Champhai district-a tlawmngai pawl hrang hrang aiawhte chuan an thurel bawhzui nghalin, thutkhawm an neih zawhah bawrhsap sawn tumna an pawm lohzia leh an duh lohzia lantir nan transfer order lehkha an hal nghal a ni.
He thutkhawmah hian tlawmngai pawl hrang hrang pariat: Sub-Hqrs.YMA, MUP, MHIP, MZI, MZP Hqrs. Champhai Nature Conservency, Champhai |halai Pawl leh Champhai Dawrkai Association hruaitute an tel a ni.
Hetih lai hian nimin vek khan Champhai DC hova thukhawm chuan leilet zawla kuhva kudam tam tak awm pawh ‘dan lo a ni’ tiin WRC (leilet ram) a zim tual tual chu ngai a awh leh theih nan hma lak an tum thu an pass bawk.