Mizoram Merchant Association (MIMA)-in sorkar thupek anga Aizawl chhunga dawr inhawn chhawk kalpui mek tihtawp a nih theih nana hma la turin chief minister an ngen.
MIMA hruaitute chuan nimin khan Chief Minister Zoramthanga chu a pisaah an hmu a, hri laka mipui himna tura inkaihhruaina kalpui meka Aizawl chhunga dawr inhawn chhawk kalpui chungchang an sawipui a. Dawr inhawn chhawk hi hri darhna tur venna a nih loh thu te, ram economy chhe lo zawnga hri doa CAB tha taka kalpui chu hri darh zel tur danna tha ber a nih thu an thlen.
Tun dinhmuna Mizoram chhunga hri inkai darhna hmun chu Aizawl pawn lam a ni a, chungahte dawr inhawn chhawk kalpui a nih loh laia Aizawlah dawr inhawn chhawk a ni tlat chu an hriatthiam loh thu MIMA hruaitute chuan an sawi a, dawr inhawn chhawk tihtawp a nih theih nana hma la turin chief minister chu an ngen a ni.
Chief minister pawhin MIMA hruaitute ngenna chu awm a tihpui thu a sawi a, sumdawnna hmun khar lo zawnga hri dona kalpui chu a duh dan a nih thu leh an ngenna tihlawhtling tura hmalak a tum thu MIMA hruaitute hi a lo hrilh a ni.