China chuan an rama nau piang an tlem lutuk tihziaawm nana nupain fa hrin tam a kalpui thar leh mek laiin nikum chhung khan mi 1,000 zelah nau 7.52 chauh piang ang niin kum khat chhunga a tlem ber tum a ni hial.
National Bureau of Statistics-in Thawhtannia an chhinchhiahna an tihchhuahah China hian nau pian pun theih lohna an nei chhunzawm zel a. Nikum lawkah nupain fa pathum neih phalna siam mah se awmzia a la awm thei lo.
China hian nau piang an pun theihna turin kum tam tak a lo kalpui tawh, fa pakhat chauh neih phalna chu kum 2016 khan fa pahnih neih phalah a tipung a. Hei hi thalai an pung chak lo va, hna thawk thei an tlakhniam zel vang a ni a; mahse, nupa tam tak chuan khawpui liana khawsak a hautak em avangin fa neih tam hi an tum lutuk lo.
Kum 1949-a chhinchhiahtu an awm atangin nikum kha kum khata nau piang zat bi a hniam ber tum a ni.
Nikum chhung khan China mipui punna hi 0.034% chauh a ni a, hei pawh hi kum 1960 hnua a hniam ber tum a ni.
Pinpoint Asset management-a chief economist Zhiwei Zhang chuan, “Miin fa neih teuh an duh loh chhan hi chu thil chiang a ni a; mahse, mi an upat chakna hi a kal chak a, anmahni thlaktu tur thalai an pun chak lohna a sang em em bawk si,” a ti.
“Tuna a lan danah chuan nikum kha China-a mihring cheng an tam lai ber a ni thei a. China-in than theihna a neihna pawh beisei aiin a kal chak loh phah dawn a ni,” a ti bawk.
Kum 2021 chhung khan nau maktaduai 10.62 chauh an piang a, a hma chiah kumah maktaduai 12 an piang thung.
Kum 2020-ah khan mi 1,000 zelah nau 8.52 piang ang an ni.