Punjab assembly inthlan tur chu February 20-ah sawn hlat a ni tih Election Commission chuan Thawhtanni khan a puang.
Ruahmanna hmasaah chuan February 14-a neih tura tih kha a ni a; mahse, Guru Ravidas Jayanti lawmna nena a innan dawn avanga political party-ten Election Commission-a an ngen angin sawn a ni.
Punjab Chief Minister Charanjit Singh Channi chuan Election Commission hnenah hian assembly inthlan chu ni ruk taka sawn hla turin ziakin a thlen a ni.
Punjab-a cheng zinga 32% zet tling phak, Scheduled Caste-te chuan February 10 leh 16 inkar hian Guru Ravidas Jayanti pualin Varanasi, Uttar Pradesh an tlawh nasa dawn a, mi tam takin vote an thlak theih dawn loh avangin sawn tura ngen a ni a. Guru Ravidas-a piancham hi February 16 a ni.
Election Commission chuan thuchhuah siamin political party hrang hrang, Punjab sorkar leh pawl hrang hrangin inthlan hun hi sawn turin an ngen tih an tar lang.
“Guru Ravidas-a piancham lawm hian mi tam takin inthlan dawn velah hian Varanasi an pan a ngai dawn a, February 14, 2022-a vote thlak a nih chuan mi tam takin an thlak theih loh phah dawn a ni,” an ti.
“Hetiang a nih avang hian state sorkar leh Chief Electoral Officer te rawn chungin, tun hma lma thil lo thleng tawh leh thleng theite thlir chungin, commission chuan inthlan hun tihdanglam hi a titlu ta a ni,” an ti bawk.
BJP leh an thawhpui, chief minister hlui, Captain Amarinder Singh-a kaihhruai, Punjab Lok Congress pawhin Election Commission hnenah hian February 14-a inthlan chu sawn turin an lo ngen tawh bawk.
Pathiannia Punjab BJP General Secretary Subhash Sharma-a’n Chief Election Commissioner hnenah lehkha a thawnah, “Guru Ravidas-a zuitu an tam a, heng zingah hian Punjab-a cheng zinga 32% lai tling, Scheduled Castes (SC) pawh an tel a. He ni lawm tur hian maktaduai telin Banaras, Uttar Pradesh an pan dawn a, an tan vote thlak ngaihna a awm dawn lo a ni,” a ti.
Punjab Aam Aadmi Party chief Bhagwant Mann pawhin an party chuan Election Commission hnenah inthlan chu chawlhkar khata sawn hla turin an ngen tih Twitter-ah a tar lang.
Vote thlak ni hi sawn mah se vote chhiar ni erawh March 10 a la ni zui dawn a ni.