Kolasib district All NGO Coordination Committee hruaituten nimin khan Chief Minister Zoramthanga an hmu a, Kolasib bawrhsap sawn hun tikhawtlai turin an ngen.
Kolasib Jt. NGO Chairman Thomas D Lalengliana’n The Zozam Times a hrilh danin, Jt. NGO hruaitute chuan Kolasib Bawrhsap Dr H Lalthlangliana sawnna order chu tikhawtlai turin chief minister hi an ngen a, Bawrhsap hian ramri chungchangah hmalakna pawimawh tak tak a neih rih avangin tuna han sawn thut chu a hun rih lo tih an hrilh.
Thomas D Lalengliana chuan CM nena an inkawmnaah hian Jt. NGO hruaitute chu an lawm haw hle tih sawiin, “Pu Zorama hian kan ngenna chu an lo sawi ho tur thu a sawi a, an tihhlawhtlin pawh kan ring,” a ti.
Kolasib bawrhsap sawn hun tikhawtlai tura an ngenna chu a lo hlawhtling lo a nih pawhin sorkar rorel dan chu an pawm thlap dawn tih Thomas D Lalengliana chuan sawiin, sorkar hnathawk sawn hi kalphung pangngai a ni a, an dodal loh thu leh an bawrhsap ni mek hian ramria hmalakna laklawh a neih avanga a insawn hun tikhawtlai tura ngen mai an nih thu a sawi.
Tun hmain bawrhsap emaw, doctor emaw sawn chungchangah sorkar lakah lungawi lohna an lo lantir nasa tawh thin tih sawiin, a hnu leha awm tur tan thil nuam lo tak a nih vangin a tul thlu ngang a nih loh chuan insawnna order sut tura innawr chu an ti dawn lo tih Thomas D Lalengliana chuan a sawi bawk.
Tar lan tawh angin Inrinni zan khan Kolasib district Joint NGO chu an thukhawm a, Kolasib bawrhsap sawnna thupek chhuah chu tihmuan a nih theih nan CM ngen nise an ti a, an thurel bawhzuiin nimin khan CM hi an hmu ta a ni.