Uttar Pradesh Chief Minister Yogi Adityanath chuan Samajwadi Party chu thla thara an state assembly inthlan lo awm turah beiin ‘thubuai nei mekte inthlan chuh tura ti-ah’ a puh.
Adityanath chuan BJP-in thuneihna an chang a nih phawt chuan heng thubuai neite lakah hian dikna an hlen chhuah vek dawn thu a sawi bawk.
“SP hian an nihna pangngai pho lang nawn lehin thubuai neite inthlan an chuhtir dawn leh a. BJP-in thuneihna a chang a nih chuan an laka dikna hlen chhuah a ni ang,” tiin Ghaziabad-ah a sawi nii news agency ANI chuan a tar lang.
Adityanath-a’n hetianga eptu party a beih hma lawk hian SP-in an candidate, Kairana bialtu MLA ni lai, Nahid Hassan chu Gangsters Act hmangin kum 2021-a a laka thubuai siamah man a ni.
Hassan-a hi candidate atana tihna chu an party-in titawp nghalin a farnu an dintir dawn a. Chuh tura hming pe lut tura a kal chu man a ni a. SP chief Akhilesh Yadav chuan an hruaitu an man hi rorel laiin an hruaitu leh an candidate-te laka beihna a thlenna niin a sawi.
Adityanath-a hma hian BJP hruaitu, Union Minister Anurag Thakur chuan Pathiannia Kanpur police lal thin, Asim Arun a lawm luhnaah Yadav-a leh SP hi beiin an candidate list chu ‘tan in atanga intanin bail-ah a tawp’ tiin a sawi.
Thakur-a hian Hassan-a man leh SP hruaitu hlun, Azam Khan-a fapa, Abdullah Azam-a Sitapur Jail atanga bail-a chhuahtir chungchang a sawi a ni.
‘Buaina siamten SP zawmin buaina siam mantuten BJP an zawm thung’ niin a sawi bawk.
Union minister hian kum 2017 atanga Adityanath-a sorkara chanvo pawimawh tak chang thin – Swami Prasad Maurya, Dara Singh Chauhan leh Dharam Singh Saini ten tun hnaia SP an zawm chungchang a sawi a ni.
Tun hnaiah chief minister tang lai leh a hma chiaha mite hi an inbei nasa zual hle a, hei hi BJP-in a chakna mual, Gorakhpur-a Adityanath-a an dintir leh dawn tih an puan hnuah a ni zual.