Khawpui laili atangin AR an la chhuak hlei thei lo
Thawhtanni a Hnam Run hawnna inkhawmah, MNF Senior Vice President leh Dy. Chief Minister ni bawk Tawnluia chuan Assam Rifle te chu chhuak tura an inbuatsaih mek thu leh an hmunhmate chu mipui vantlang tana dah a nih tur thu a sawichhuak leh a, an chhuah hun tur tak erawh sawi a la ni lo thung.
Aizawl khawpui laili atanga AR sawnchhuah tur hi a thawm awmna a rei tawh hle mai a, a tak hmuh tur erawh a awm har hle thung. Hmalak a har a nih a rinawm a, sorkar na changtu apiangin an ti hlei thei lo zel mai bawk nen, tawngka maiah hian kan tawp leh ang tih a hlauhawm hle.
MNF senior vice president sawi danin, Assam Rifles sawn chhuahna turin Laldenga hunah Zokhawsang hmun pek an nih daih tawh thu leh MINECO hi MNF sorkar hmasaah Assam Rifles ram chhuhsaka din a nih thu a sawi a. Deputy chief minister ni bawk, Tawnluia chuan, “Assam Rifles chhuahsan ram hi mipui vantlang tan liau liaua hmang turin MNF sorkar hmasa khan danah kan dah nghet tawh a. Assam Rifles-te hi chhuak thei turin an inbuatsaih mek zel a, an chhuak ngei ang,” tiin a sawi bawk.
A tak hmuh tur a awm phawt loh chuan AR sawnchhuah hi chu rin ngawt a har tawh deuh a, sorkar lai hian an insawihnaihsiak ni ber hian a lang thin a, tuna MNF leh sorkar hotu sang sawi danah pawh hian hnaivai viau angin lang mah se, an hmalakna thenkhat a sawichhuak thar leh a ni ber rih a, mipui beisei leh duhna hi a thlen thuai hlan erawh a nghahhlelhawm tawh hle a ni.