Auto Corner
by Ruata
Hyundai Venue vrs Creta hmel thar
South Korea company lar leh tha em em Hyundai chuan India rama an SUV huanga lirthei hralh kal tak pahnih Venue leh Creta chu hmel thar (2022 facelift) kumin chhunga tichhuak turin an inbuatsaih mek a. Hemi rual hian Hyundai hian SUV dang new generation Tucson leh Kona Electric facelift te tichhuak turin ruahmanna an siam bawk.
2022 Hyundai Venue facelift
Hyundai Venue facelift hi Creta facelift aia chhuak hmasa hret tura beisei a ni a, kum 2022 laihawlah pawh a chhuak hman maithei niin report thenkhat chuan an tarlang a ni. He SUV hi kum 2019 atang khan India market-ah tihchhuah tan a ni a. Tunah hian a hmelhmang leh thil dang dang thlak danglam ve hret a hunah company chuan a ngai a tih theih a. Design thar mawi tak leh tuna a hmel ngai reng aia danglam ve hret kan hmuh a ri-
nawm a ni. Facelift model-ah erawh hi chuan a hmel hi an thlak hlawk lutuk lo a, a awmsa tlem tlem a tuai danglam ve hret chauh thin a ni. 2022 Venue facelift South Korea-ah chuan an enchhin lai thlalak hrang hrang a darh nasa tawh viau a. A design-ah danglamna hret hret a awm.
Hyundai Venue facelift -ah hian company in design language thar an neih, Tucson tharah te pawh kan hmuh tawh ang hi a rawn nei ve tura ngaih a ni a. Tucson tharin a neih ang deuh a hma grille thar, parametric grille thar bakah, rectangle pian ang headlamp a bumper hnuailamah kan hmu dawn a ni. LED DRL pawh Creta tharin a neih ang a neih ve beisei a ni a. He SUV rear profile siam thar, tailgate thar leh LED tail-light design thar hlak a nei dawn a, double-barrel exhaust pawh kan hmuh hmel.
N-Line variant hi a nei maithei a, hei erawh company lamin an rawn tichiang ang a. A nei a nih hloh chuan India rama N Line lirthei lo chhuak tawh i20 N Line chu N Line chhungkuaah a rawn zawm ve dawn a ni. A chhunglam chu a danglam tam lutuk a rinawm loh a, infotainment system erawh an rawn thuam thar hret ang a, BlueLink connected car tech thar leh a chhung rawng thar kan hmuh a rinawm bawk a ni.
A khawl pawh a ngai, 83bhp power leh 113Nm torque pechhuak thei, 1.2L Naturally Aspirated petrol, 118bhp power leh 175Nm torque pechhuak thei, 1.0L turbocharged petrol leh 99bhp power leh 240Nm torque pechhuak thei, 1.5L turbo-diesel te a nih leh hmel.
2022 Hyundai Creta Facelift
Hyundai chuan Creta facelift thar tur hi Gaikindo Indonesia International Auto Show (GIIAS) 2021-ah an phochhuak tawh a. He Creta hmel thar hi Hyundai Sensuous Sportiness design philosophy anga duan a ni a. A hma bawr design chu Tucson chhuak thar a ang viau dawn a. Parametric jewel pattern grille thar mawi tak a nei dawn a. A hmaah hian LED DRL thar leh rectangular shaped LED headlamp te a nei ang a. A bumper lamah chuan air inlet te zawk, silver coloured faux skid plate leh fog lamp housing design thar a nei a ni.
A sir lam design chu a pangngai nen a inang viau a, hetihrual hian alloy wheel thar a nei thung dawn a ni. A chhunglam pawh tuna chhuak mek nen a inang viau a, India rama Creta thar chhuak tur hian ADAS (Advanced Driver Assistance Systems), digital driver’s display thar leh updated BlueLink connected car technology te a nei dawn a ni. Creta thar hian 360 degree camera a neih beisei a ni bawk a. A khawl chu a ngai ang a ni dawn bawk.