January 18, 2022-a Congress Bhavan hawnna inkhawmah thu sawiin, MPCC Treasurer Zodintluanga Ralte chuan, “Sorkar hnathawk hlawh lak headline news a ni tawh hi thil zahthlak tak a ni a. Kan ram dinhmun thlir hian a beidawnthlak a ni,” a ti.
Zodintluanga Ralte hian MNF sorkarah chuan finance department-in a tlachawp takmeuhin sorkar hnathawk hlawh tur an dapkhawm thin tih sawiin, “Thla tirah sum kan zawng khawm a, Group D hlawh tur kan dapa kan pe hram, a kar lehah Group C hlawh kan dap leh a, kan pe hram a. Group A leh B ten an nawr chhuak hram bawk,” a ti a; Congress sorkar Lal Thanhawla kaihhruai hnuaia Lalsawta’n finance a chan laiin sorkar hnathawkin thla thar hmain a hun takah hlawk pek an nih thin thu a sawi.
“Vawiinah chuan sorkar hnathawkten harsatna nasa takin an tawk a, hlawh pek tlai bakah GP Fund pawh an la thei ta lo. Chumi siamtha leh thei chu Congress party chauh a ni,” a ti.
Ramri chungchang sawiin CLP Leader hian, “Kan sorkar lai khan ramri chungchangah nasa takin min dem a; mahse, kan sorkar lai khan kan ram hi inches khat pawh kan tawlh lo. Tuna sorkarah chuan Mizoten kum tin an hmunphiah an lak thinna chu vawiinah an seng thei tawh lo. MNF sorkar hnuaiah kan ram kan tih kha Assam ram a lo ni ta, nasa takin MNF sorkar hnuaiah ram hi kan chan a ni,” a ti bawk.