Chhingchhip-a Sainik School hmasawnna hnathawhna tur Mizoram sorkar atanga sum dawn a ni tawh lo chu pawi an tih thu sawiin, Congress party chuan an mamawh ang sum leh pai pe thuai turin Mizoram sorkar an ngen.
Nimina thuchhuah an siamah Congress party hian Sainik School din a nih theih nan Lal Thanhawla kaihhruai Congress sorkarin theihtawp chhuaha hma a lak thu leh, Chhingchhip mipuite pawhin an mi mal ram zau tak school building leh thawktute chenna tur quarter sak nan phal takin an lo hlan tawh niin an sawi.
“School chhung hmunhma chei leh siam that hna hi state sorkar kut a nih avangin hemi atana mamawh sum leh pai pawh Sainik School hian Mizoram sorkar atangin a dawng ngei tur a ni a; hei hi chatlak loa pek chhunzawm zel turin Congress party chuan Mizoram sorkar a ngen a ni,” an ti.
Mizoram sorkar atanga Sainik School hmasawnna hnathawhna tur sum dawn a ni tawh lo hian school hmasawnnain nasa taka a tawrh zui dawn avangin an mamawh ang sum leh pai pe thuai tur leh, Mizo thalai tam tak sipai (Armed Forces) leh Para Military Force a an tan theihna tura inchherna hmun a nih bakah, hna zahawm dang tam tak an thawh theih nana an inzirna hmun tur, zirna in tha tak a nih avangin state sorkarin a pek tur sum leh pai te hi a rang lama ruahman zung zung turin a mawhphurtu Mizoram sorkar an phut thu an sawi.
Mizorama Sainik School hi kum 2017-a din niin, khatih laia chief minister Lal Thanhawla’n Union Home Minister Rajnath Singh hnenah India rama Sainik School 33 awm zinga hmeichhe luh theihna hmasa ber ni tur hian DO Letter hmanga thlenin, kum 2018-2019 session atangin hmeichhe naupangte luh tir tan an ni ve tah thu an sawi a. Mizoram chhung mite tan seat 67% lai hauh (reserve) a nih thu an sawi bawk.