World Health Organisation (WHO) hotupa chuan khawvel ram hruaitute chu warning pein coronavirus hripui chu ‘a la reh mai hnai lo’ tih a sawi.
Dr Tedros Adhanom Ghebreyesus chuan hri thar, Omicron variant chuan natna a thlen nat lem loh avangin khawvelin a hlauhawmna chu a ngaihthah ta niin a sawi.
WHO chief-in hetianga a sawi mek lai hian Europe ram tam tak chuan kai tam ber hun lai an tawng mek zel.
France chuan Thawhlehni khan hri kai maktaduai zahve dawn an nei tih an sawi.
Hripui a len atanga a vawi khat nan Germany-ah pawh Nilaini khan mi 1,00,000 chuang kai hmuh thar an ni.
Geneva-a WHO hmunpuia thuthar lakhawmtute a kawmnaah Dr Tedros chuan Omicron variant vangin chawlhkar liam ta chhungin hri kai mi maktaduai 18 zet an awm thu a sawi.
He variant hi a thawk na lo tlangpui nia a lan mek laiin Dr Tedros chuan, “Hetianga sawi hi inhruai sualna a ni,” a ti.
“Tihsual palh nei lo ang u, Omicron vangin damdawi in lut leh thi an awm a, a na tawk lo tih ni mah se damdawi in indaih lohna a thlen tho,” a ti.
Khawvel ram hruaitute chu Omicron darh chak ngaihthah lo turin a ti a, variant thar lo chhuah theihna remchang a awm reng a, chu chu chhui leh hmalak a buaithlak chhan niin a sawi bawk.
“Ram tam tak, invenna la pek tam lohna bikah, invenna la la lo zingah chu natna na tak leh thihna hial thlen thei a ni,” a ti.
WHO hnuaia emergencies director, Dr Mike Ryan-a pawhin Omicron chu inkai a chak miau chuan damdawi ina awm leh thihpui an pung dawn tih a sawi a, a bikin invenna la tam lohnaah a ni dawn niin a sawi.
“Hri kai hi an pung chak em em a, a thawk na lo ti mah ila damdawi in lut leh thihna a thlen a pung tho vang,” a ti.
Coronavirus hi Europe khawmualpuiah chuan kai an pung chak hle a, Omicron variant-in a tuam mek zel.
Denmark-ah Thawhlehni khan kai mi 33,493 hmuh niin Italy-ah mi 2,28,179-in an kai a, a hma nia 83,403 atangin a pung hle.
Germany-ah Nilaini khan hri kai mi 1,12,323 zet hmuin chawlhkar khat liam ta chhungin mi 1,00,000 zelah mi 584.4-in an kai ang a ni a, a san lai ber a ni.
France-ah pawh Thawhlehni khan hri kai mi 4,64,769 hmuh niin a hma nia hmuh let li zet a ni a. Chawlhkar liam ta chhunga ni khata mi 3,00,000 vel hmuh atangin a sang hle.
Hri kai an pun mek lai hian French minister-te leh zirtirtu pawlte chu an innawr mek a. Tun kara a vawi hnih nan sorkarin Covid kai leh kai loh endik leh a kai awm hran a kalpui dan chuan zirtirna an kalpui dan a tibuai tiin zirtirtute hian nawrhna an huaihawt.
Kar hmasa khan sorkar kal dan dodal nan ni khat hna an thawk duh lo va, an rama primary school zahve zet khar a ni.
Zirtirtute hian zirna kal lai tihbuai chu ruahmanna siam thiam lohthlak an ti a. Nu leh pa tam tak tan invenna la tura inziah luh a harsa a, kai leh kai loh endik turin rei tak tak intlar a ngai thin bawk tih an sawi.
French Education Minister Jean-Michel Blanquer chu Ibaza-a chawlh a hman laia sikulte tana Covid-testing protocol a puan avangin bâng turin an nawr hial.
Europe-a hri kai an tam mek lai hian ram tam tak chuan a vanglai an thleng tawh nia ngaih a ni.
Ireland-ah chuan kai hmuh zat an tlahniam hret tih Health Minister Stephen Donnelly chuan a sawi a. Inkhuahkhirhna an kalpui pawh tun thla tawpah an phelh theih a beisei.
Spanish sorkar pawhin Omicron a darh atanga thla hnih leh a chanve hnuah a kai an tlem tan tih a sawi.
UK-ah pawh minister-te chuan hri kai an tlakhniam avangin inkhuahkhirhna an siam chu ennawnin Nilaini khan an thukhawm.