LBS Suzuki chuan nimin khan an showroom Bawngkawn, Aizawlah Avenis 125 an tlangzarh a, Covid-19 leng avanga harsatna karah anmahni chawikangtu a nih ngei an beisei.
Info Bikes chief test rider Vanlalmuana chuan kum kal ta chhungin Mizorama two-wheeler hralh zawng zawng 50% chu LBS Suzuki atanga chhuak niin a sawi a, Avenis an hlawhtlinpui leh ngei a ring.
Muantea chuan, “Mizoram scooter hralh kal em em Access leh Burgman engine ang a hman avangin a tha dawn a. Changkang zawka thuam a nih bakah Avenis hi sports scooter ni mah se a sawh a na lo va, khalh a nuam bawk,” a ti.
Nikumah India ramah Suzuki Avenis 125 pho chhuah ni tawh mah se an siam chhuah tam theih loh avangin Mizoram a thleng ve mai thei lo. Chutih rualin Mizorama Suzuki two-wheeler dealer kuta an pek rual-in ngaihven a hlawh a, beiseina sang tak an nei tih LBS Suzuki chuan an sawi.
Muantea chuan, “Mizote tana pawi-mawh ve riau chu Avenis-ah hian a hmaah gas bur a phurh theih. LBS Suzuki hi dawr an nuam a, lirthei an hralh tawh enkawl zui kawngah an chet tha bawk avangin tuna mi pawh hi an hlawhtlinpui leh ka beisei hle a ni,” a ti.
Khawvel pumah semi-conductor tlakchhamna avangin company hrang hrangin an tuar a, lirthei siam chhuah a tlem phah a, hri lengin mipui sum dinhmun a nghawng tel bawk avangin lirthei zuartute tuarna a zual.
Kg 106-a rit Avenis hi Mizorama tlangzarh a nih rualin ni hmasa berah hauh lawk mi 100 vel zinga 25 tal pek chhuah hman an tum a, Rs 1,08,223-in an hralh chhuak a ni.