Health minister Dr R Lalthangliana’n mi tlema zawng COVID19 vaccine la duh lo, sakhuana avang leh harsatna dang avanga la lo an la awm tih sawiin, mi nuai sawmpathum singriat chuangin vaccine an lak tawh thu a sawi.
Aizawl city college joint students’ union (ACCJSU) meet, Cultural centre-cum-auditorium, Vaivakawna neih a hmanpuinaah he thu hi nimin khan Dr R Lalthangliana chuan a sawi a. “India ramah kum 18 chin chunglam hnena first dose pekah a ti tha pawl kan ni a, thla chanve vel chhungin kum 15-17 inkar vaccine first dose la mi 37360 an awm tawh a, kan target 57% chu kan hlen tawh” a ti.
Health minister chuan precaution dose (booster) pawh health care worker mi 3508 leh frontline worker mi 2650 vel hnenah pek a nih tawh thu sawiin, kum 60 chunglam, natna benvawn nei mi 1785 hnenah precaution dose pek a ni tawh tih a sawi bawk.
Kum kaltaah Mizorama COVID19 kai hmuhchhuah zawng zawng atanga za-a 60 chu Aizawl district-a hmuhchhuah a nih thu sawiin, “Krismas leh kum thar kan hman zawh hnu hian 29% velah tla thlain, thingtlang lamah a hluar ta zawk tlat mai hi thingtlang lamah fimkhur lehzual a ngai takzet zet a, mask hman that, midang hnaihloh a awm te a tangkai em em” a ti bawk a ni.