- Dr. C. Lalrampana –
A KAMKÊUNA
Khawvel ram tinte hian dan leh dun tha tak an nei theuh a, mipui rorelna ram a ni emaw communist, dictator,, sipai rorelna (military regime) a ni emaw, eng sawrkar pawhin rorelna kengkawh se inkaihhruaina dan leh dun mumal tak (act) an nei ngei ngei thin. Ram hruaitulute chauhin mipui rawng bawl hna an tlin bik lova; anmahni puibawmtu tur mipui mamawh phuhruktu tur hnathawktu hlawh neia chhawr engemawzat an lak a ngai thin. Chutianga puibawmtu tur an lakte chu sawrkar hnathawk (Government servant) tih an ni a. Sorkar hna lak dan mumal tak (recruitment rules) dungzuiin hna hniam ber atanga a sangber thlengin lãk (recruit) an ni thin. Chungho enkawlna tur chu dan leh dun (service conduct rules) felfai tak siam a ni a, an thawh ngheh (regularize) dan, hlawh zat, awmhmun sawn leh siamrem, siksawi leh ban, hrem, pension dan tur. thlengin dan leh dun fel tak hnuaiah hnathawktute chu phuarbeh an ni. Chung an hnathawkte enkawlna tur dan (act) chu rorelna in sang berin a pawm (passed) hnuah hman thin a ni. Chuvangin, hemi chungchangah hian mi tam takin thil hriat chian tawk loh kan nei thin nia a lan avangin tlem azawng i han haihawng teh ang.
SAWRKAR CHU TUNGE?
Sorkar chu mipui chunga roreltu pawl awmze neia inhlãwmkhãwm, ram hlãwn (state) khat chunga roreltu pãwl, thuneihna sang tak nei a ni a; sorkar chuan rorel theihna tura dan zam theihna (legislature) neiin chu chuan rorelna kengkawhtu (Executive) leh Rorel dan hmang (judiciary) a nei ngei ngei thin. Sorkar inrelbãwlna tha leh tha lo, inkaihhruaina tha, leh tha lo, langtlang sorkar, mipui huapzo sorkar leh lang tlang lem lo, mipui huapzo lem lo, sorkar hrawn khirh takte pawh a awm thin. Engang pawh chu ni fahmiang, ram bial/hlãwm khat chunga roreltu inhlawmkhawm pawl chu sorkar kan tih chu a ni. Khawvel ram hrang hrang chunga roreltu sorkar erawh kan chenna hmun leh ram a danglam angzia zelin a inang vek kher lo. Khawvelah hian mipui rorelna ram (Full democracies 23;
Mipui rorelna deuh reuh (Flawed democracies) 52; sipai & mipui rorelna inkawp (Hybrid regimes) 35; Authoritarian regimes 57; an awm a, tin, one-party states (dictator) kan tih hi China, Cuba, Eritrea, Laos, North Korea & Vietnam-te an awm a, Sahrawi Arab Democratic Republic pawh hi one-party state ni tho mah se UN-in a pawm rih lo. Heng bakah hian mali, chad, guinea, Sudan, myanmar-te hi sipai rorelna a ni a, nikum 2021 thleng khan sovereign states (monarch head of state) ram 43, awmin . Asia-ah 13, Europe-ah 12, North America-ah 9, Oceania-ah 6, & Africa-ah 3 an awm bawk. Heng ram hrang hranga roreltu sawrkarte hian an thuneihna huamchhungah chuan an duh ang angin ro an rel thei a, an hnuaia hnathawktute thununna thuah pawh an duhdan danin dan & dun an siam thei bawk.
MIZORAM SORKAR
Mizoram pawh hi ram bung khat kan ni a, min awptu sorkar laipui ber chu India niin khawvela mipui rorelna ram lian ber a nih avangin kan sorkar rorelna pawh democracy a ni. Kum 2015 atang khan sorkar laipui chuan langtlang sorkar, sorkar rintlak leh tha (good governance) a rawn kalpui tan a, a vanneihthlak hle. December 25, 2014 hma lam zawng, India Indepence day atanga chhuta Kum 67 chhung kha sorkar tha lo (bad governance) kan hrawn thin tihna a ni ngei ang. Mizoramah pawh Mizo District Council 1952-2014 kum 62 chhung zawng khan sorkar tha lo (bad governance) kan hrawn thin tihna a ni thei bawk. Eng sorkar pawh hrawn thin ila kha sorkar khan a hlawhfa chhawr (Govt. Servants)-te chu dan leh dun mumal tak hmangin a enkawlin a kaihruai thin a ni.
SORKAR HNATHAWK SAWN THEITU
Tarlan tawh angin khawi ramah pawh sorkar hnathawkte chunga thuneitu leh anmahni hlawh pea thununtu, an awmhmun siksawi leh siamrema hmun hrang hranga sawn kual theitu chu an chunga roreltu sorkar (competent authority) a ni. Sorkar laipuia hnathawk central services-te pawh CCS Conduct rules 1964 felfai tak hmanga enkawl an ni. Hetiang zulzui tho hian India rama state tinte pawh hian an hnuaia thawktu sorkar hnathawk hniam ber atanga a sangber thlengin an enkawl thin. Mizoram sorkar hnathawkte pawh hemi dungzui hian enkawl an ni a, DP&AR (GSW) Office Memorandum No. A. 35011/1/2013-P&AR (GSW) dated Aizawl, the 2nd July, 2014 angin state govt. employees zawng zawngte chu deputation & transfer etc thlenga siksawi kual theih an ni. MCS-te phei chuan Mizoram gazette Vol. XXXV Aiawl, Tuesday 29.08.2006, sravana 7, S.E 1928, Issue No. 214-in Notification No. A. 22011/1/2000-P & AR (CSW), the 21st. August, 2006 a chhuah angin awmhmun sawn kual theihna dan leh dun felfai tak an nei a, hemi tlawhchhan hian an chunga thuneitu (competent authority) chuan a siksawiin a sawnkual thin a ni. Tin, Mizoram sorkar hnathawk Service cadre hrang hrang leh department hrang hrangte pawhin insawn kual theih dan felfai tak an nei vek a, hetiang dungzui hian competent authority chuan a hnuaia hnathawkte chu tute pawh ni se a tuldan azir zelin a siksawiin a sawn kual thin a ni.
MCS SAWN KUALTE:
Tun hnaiah Mizoram Sorkar chuan Notification No. A. 22012/)48/2015/P&AR(DSW) Dated Aizawl, the 13th. Jan. 2022 angin MCS Officers 12-te awmhmun a siksawi a. He Notification-ah hian Champhai DC Pi Maria C.T. Zuali chu No. 1-ah langin Kolasib DC Dr H.Lalthlangliana chu No. 2-ah )angin transfer zingah an tel a. Pi Maria C.T. Zuali DC Champhai leh Dr H.Lalthlangliana D.C Kolasib-te hi MCS Supertime B ni tawhin Supertime B mi 8 awm zingah Pi Maria C.T. Zuali hi 5na niin Dr. H. Lalthlangliana hi 6-na a ni. Anni hi Addl. Secy rank an nih tawh vanga sawn ngai tawh an nih hmel a, an pahnih hian, Selection Grade (Joint Secretary) post an ni.
Champhai DC, Pi Maria C.T. Zuali hi sawrkar hian a duhsak hle niin a lang. Dept zinga pawimawh bera ngaih Planning & Program Implementation Deptt an chantir a. Hetiang Deptt pawimawh an chantir hi a phu hle a, a lawmawpuiawm takzet a ni. Supertime B an nih tawh vang leh an tenure tawp tawhIi vanga transfer ngai an ni bawk.
Kolasib DC thothang tha tak leh viak tha tak, huaisen bawk si Dr. H. Lalthlangliana School Education an chantir hlauh mai phei hi chu School Education tan vanneihna ropui tak niin a lang. A chhan chu amah hi MCS val ni mah se School Education hrechiangtu leh hun rei tak Science Teachers Association of Mizoram (STAM) hruaitu dinhmun lo chelh ve tawh thin a nih hmel a, a mikhual dawn lo hle a, School Education tan a hlawk thlak hle dawn a ni.
ENGTI ZIA NGE NI TA?
Sorkar hnathawk sawn kual chungchangah hian mipui, NGO, Pressure group, khawtlang, veng bil, eptu pãwlte hian thawm neih deuh hluai kan ching thin. Sikul, college, institution zirtirtu, professor leh hriselna lama thawk doctor leh thawktu dangte sawn kual chungchangah phei chuan kan bengchheng leh hluai thin. Tun tumah pawh abikin Champhai DC Pi Maria C.T. Zuali leh Kolasib DC Dr. H. Lalthlanglianate awmhmun sawn chungchangah “an thãwm midelte hriat khawpin” tih hla ang maiin an insawn thawm chuan Zoram khawvel a deng chhuak hneh hle. Hetiang a nih tãk hluaina chhan hi kan MCS Officers fel tak tak 2-te hian anmahni ruaitu sorkar leh an rawngbawlsak Zoram mipui leh an ram Mizoram (India) tan dikna, thianghlimna leh felna (integrity) an vawn nun tlat vang a ni a, an thawh that bik hluai tãk vang pawh a ni chuang lova, an tihtur dik tak an tih vang zawk a ni. An thiante MCS dang 10 an ruala sawn ve takte pawh hian integrity an vawng nung ve lo tihna a ni chuang lova an hna chanvo leh awmhmunin a zir ve loh vangin an langsar ve lo mai chauh a ni. Sorkar Thuneitute’n dan leh dun mumal tak (posting & transfer rules) behchhana a tuldan leh mamawh dan azira a hnathawk (servants)-te awmhmun a siksawi apiang deuhthawa mahni duhdana lo herremsak tum niawm taka kan phili ruai thin hi sim atan a tha hle mai. Sorkar hnathawk tha leh fel bika kan ngaih, an awmna hmuna mipuiin an ngainat leh an duh ngawih ngawihte hi an ngainat leh duh ngawih ngawih ang tho hian an va insawnna turte pawh hian an duhin an lo nghakhlel ve êm êm thin a ni tihte pawh kan hriatthiam a tha hle.
Sorkar hnathawk zawng zawng hian pisa dan ang (office of procedure) an thlapin thawk theuh ta se, a ning leh ngaithei lo, phunnawileh tur chu mipui tho kan ni. Tuna kan thil tawnah pawh hian uluk taka chhut chhuah (assessment) lãk ni ta se Zoram mipui zingah Sorkar hmalak dan thlawp leh thlawp lo zaa 50% ve ve kan ni mai thei.
POLITIC-A LÃK CHI A NI EM?
Tun hma atang tawhin sorkar hnathawkte awmhmun sawn chungchangah sorkarna chelhtute leh eptu party, NGO leh mipuite hian Politicalize kan ching thin niin a ngaih theih. Sorkar department leh service chihrang hrangte hian insawn dan mumal tak an nei theuh a; heng dan fel tak posting & transfer rules ang thlapa sawnte hi tute pawh hian ngawi rengin ihe lovin pawm thlap zel mai thin ila buaina zakhua a sei thlawn lo mai tur niin a lang.
Sorkar department thenkhatah phei chuan transfer order chhuah tuka sut leh ngai, Senior zawk luahlana hmun nuam zawka junior zawk dah te, midang awm thalai luahlan ta nawlh nawlh te, kutman awm hauh si lova “politic a khel” tih vanga hmun hla zawk leh hreawm zawka dahsawn etc.-te hriat tur a awm fo mai.
Tuna kan MCS Officers fel tak tak 2-te pawh hi uibeha danbeh tlat chi an ni lo, kan danbeh tlat chuan an promotion dàltu kan ni dawn tihna a ni a, anni kan dãl chuan an hnunga mite kan dangbet ve zel dawn tihna a ni bawk ang. Chuvangin, Zoram mipuite hian sorkar hnathawkte sawnkual an nih chhante hi finfiah hmasa thin ila a tihzia ngawt ang.
A TLÃNGKAWMNA
Sorkar hnathawk chauh lo pawh, private company, kohhran, NGO etc. thlengin hnathawktute awmhmun siksawi, sianrem leh sawn, suspend, ban chang a awm fo thin. An chunga thuneitu (comperent authority)-in mipui van tlang tana thatna tur ber leh tha ber tur ngaihtuaha hnathawktute awmhmun a sawidanglam chungchangah hian lo sawi buai emaw, lo inrawlh ve sek loh hi a tha ber law’m ni tih hi kan ngaihtuah a hun hle.? Lo politicalize chin phei chu a tha lo lehzual hle a, ram hmelma lian ber kan ni thei tih i hre mawlh teh ang u.