Vaccine dodal tlat, chhuahvahnaa vaccine certificate mamawh vanga hri inkailuih tir Czech zaithiam pakhat chu a thi.
Hana Horka (57) hi vaccine la duh ngai lo bur niin, a positive thu social media-a a tarlan atanga ni hnih hnu-ah a thi niin, a fapa Jan Rek-a’n BBC a hrilh.
A fapa sawi danin, an pafa-in covid an kai tih hrerengin, a nu hian invenna a neih loh bakah an bul hnaiah a awm chhunzawm reng a, virus kai ve phawt loh chuan zaina hmun thenkhatah recovery pass a hmuh theih dawn loh avangin hri kai ngei tumin a khawsa a ni ber.
Mr Rek leh a pa te hian vaccine an la full ve ve tawh a, Krismas chho vel khan covid an kai. Mahse, heti chung hian a nu hi a awm hrang duh lo mai ni lovin, virus kai ve ngei tumin ual-au takin an bulah a khawsa chhunzawm.
“Kan pafa-a kan positive khan a lo berah karkhat vel tal chu awmhrang tur a ni a. Mahse, kan bulah a awm tluan zak a ni,” a ti.
Czech Republic ramah hian Covid chungchangah sorkar a khauh hle a, social leh culture venue angah te lut tur chuan vaccination certificate emaw tunhnaia virus kai tawh an nihna an lantir thei tur a ni a.
Hemi tel lo chuan ci-nema, bar leh cafe-ah te kal leh luh ve ngawt a theih loh. An ham strict hle a ni