UP inthlan: BJP puitu atangin Muslim candidate
Uttar Pradesh-a thawh sariha assembly inthlan turah rorel lai, BJP thawhpui, Apna Dal (S) chuan an candidate tur mi pakhat an puang a, rin loh takin Muslim a ni tlat a. Hei bakah hian a hma lawkin Congress hminga chuh tura tih a ni a, sawi lohna zawk hmingin a chuh dawn leh ta thu bawk.
Haider Ali Khan-a hi Uttar Pradesh khawthlang lam, Rampur district-a Suar biala chuh tura tih a ni a. He bialah hian Samajwadi Party MP Azam Khan-a fapa, lung ina tang mek, Abdullah Azam pawh ding tura ngaih a ni.
Anupriya Patel-i kaihhruai, Apna Dal (S) leh Sanjay Nishad-a kaihhruai, Nishad party chuan tun tum inthlan atan hian BJP te nena bial inchan sem tur an sawi chian hma hauhvin an candidate tur an puang a ni.
Khan-a an dintir tur hi BJP thawhpuiin an tih ngai loh tak niin Uttar Pradesh inthlana saffron party tanpuituin Muslim an dintir ngai mang lo.
Khan-a hi Rampur lal chhungkaw thlah a ni a, a pu, Zulfiqar Ali Khan pawh Rampur bial atangin Congress hmingin vawi nga zet MP a lo ni tawh a. A pa, Nawab Kazim Ali Khan pawh Congress hminga vawi li lai MLA lo ni tawhin tunah pawh hian a dinna tur, Suar bial bul chiah, Rampur-ah Congress hming thovin a chuh leh dawn.
Apna Dal (S) candidate hi a hma lawkin Suar bialah tho hian Congress hminga chuh tura puan vek tawh a ni a. Delhi-ah kalin Anupriya Patel nena an inkawm hnuah a chuhna tur party a thlak zui ta daih a ni.
SP hminga chuh tura sawi rik, Abdullah Azam hi kum 2017 assembly inthlanah pawh lo chuh tawhtu niin a tling nghe nghe a. December, 2019 khan Allahabad High Court chuan a tlinna hi a hnawlsak thung a, inthlan dawna hming a pek lai khan kum 25 a lo la tling lo a ni.
February, 2020-ah khan puhna hrang hrang avangin lung in a lut zui a, a thubuai zingah mi bumna pawh a tel a. Tun hnai maiah khan bail-in a chhuak a, SP hming hian a chuh leh ngei tura ngaih a ni.
Abdullah-a pa, Azam Khan hi Rampur bialtu Lok Sabha MP from Rampur niin ani pawh February, 2020 atang khan thubuai hrang hrang avangin tan inah a awm mek.
Azam Khan-a hian Uttar Pradesh assembly inthlan lo awm tura a campaign theih nan Supreme Court-ah bail a din mek nghe nghe.