California-a Monterey County-ah ram a kan ngai loh hun laiin a chhuak mek a, mi eng emaw zat inthiar chhuakin Highway 1 pawh khar a ni.
National Weather Service (NWS) chuan October leh December khaw hnawn laia ram a kang chu mak an tihthu an sawi.
Ram kang hi Big Sur Pacific vaukam hrulah niin Colorado Fire tiin an sawi a, acre 1,500 chuanga zau a kang tawh.
Tuipui atanga thli chak tak thawin a pui nasa a, hmun lar tak, Bixby Creek Bridge an tih bul lawkah a kang mek.
Forestry & fire protection thuneitu, Mike Meddles chuan California vaukam lailia kangthelhtu pawl 13-a thawkte chuan thelh tumin an bei mek tih a sawi niin KTLA digital channel chuan a tar lang.
NWS hnuaia Bay Area branch chuan tuna a kanna lai hmunah hian tun hmain ram a la kang ngai lo niin Twitter-ah an tar lang.
“Hun rei tak khawkheng tawh avangin tun hnaia ruah leh thlasik khaw vawt hian a tihnawng zo lo va, kangmei chhuak tur pawh a veng zo lo a ni,” tiin an thuchhuahah an tar lang
Khawvelah hian sik leh sa a inthlak nasat avangin khaw awm dan uchuak, lum lutuk leh ro lutuk a tam sawtin hei ram a kan duh chhan ber pakhat a ni.
Khawvel pum hi industrial era hun atangin 1.2°C zetin a lum tawh a, sorkar tam takin tan la mah se awmzia a la awm vak thei lo.
California hi kum tin March vel atangin ram kang nasa takin a tibuai deuh ziah a, tuna kang erawh thlasik lai, vur pawh a tlak nasat lai a nih avangin mak tih a hlawh hle.