India-a Covid-19 leng thawh thumna, Omicron variant-in a thleng mek chu ni 14 lo awm leh tur chhung, February 6 thleng hian a vanglai a tawng dawn niin Indian Institute of Technology (IIT) Madras chuan a sawi.
Ram chhunga zirna in sang hian ram puma R-value dinhmun atanga chhutin tunah January 14-21 inkar khar R-value hi a tlahniam leh hret tih a sawi.
R-value an tih hi hri kai mi pakhatin mi dang a kai darh zat sawina a ni a, hripui lenga a darh chak dan an sawina ber a ni.
IIT Madras-in an chhutnaah chuan January 14-21 chhung khan R-value hi 1.57 a ni a. January 7-13 chhung khan 2.2 a ni a, January 1-6 khan 4 niin December 25-31 chhung khan 2.9 a ni thung.
Khawpui lian zingah Kolkata R-value chu 0.56 a ni a, Mumbai 0.67, Delhi 0.98 leh Chennai 1.2 a ni a. Number hi 1 hnuai lam a nih chuan hripui leng chu ‘a tawp tawh’ anga sawi thin a ni.
IIT Madras-a Department of Mathematics Assistant Professor Dr Jayant Jha chuan Kolkata leh Mumbai-ah chuan hri leng hian a vanglai a thleng tawh a, hei vang hian hian hri leng chuan tawp lam a pan tihna a nih thu a sawi.
“Kan chhutna atang hi chuan tuna coronavirus leng thawh kal mek hi ni 14 lo awm leh tur, February 6 thleng hian a vanglai a liam ang a. Kan lo chhut hmasakah khan February 1 leh 15 inkarah a tawn san lai tawng tur angin kan lo sawi tawh a ni,” tiin Jha chuan a sawi.
Zir chianna leh chhut lawktute hi IIT Madras-a Department of Mathematics leh Centre of Excellence for Computational Mathematics & Data Science an ni a, ‘computational model’ an tih hmanga an chhut a ni.
India-ah hian darkar 24 liam ta chhung khan Covid-19 kai hi mi 3,33,533 hmuh chhuah leh hman niin mi 2,59,168 enkawl dam an ni a, mi 525-in an thihpui.
Hri kai hmuh tawh zawng zawng hi mi 3,92,37,264 ni tawhin mi 3,65,60,650 chu enkawl dam an ni tawh a; mi 21,87,205 enkawl mek niin mi 4,89,409-in an thihpui tawh thung.