Reality show thar, ‘Hunarabazz’ judge tur filmstar hlun Mithun Chakraborty chuan hripui kaihhnawiha lockdown puan chhoh anih lai khan chhungkua ang pawhin harsatna namen lo tawkin, an talbuai viau hman, a ti.
Times of India-in a kawmnaah restaraunt thahnem tak neitu hian coffee no khat hralh loh ni te an nei hial a, ‘Coronavirus hian min tichhe vek,’ tiin a sawi.
Sorkar-in tourism leh hospitality industry lamah rilru a seng tawk lova, tanpuina mumal a semchhuah bawk si loh avangin kum hnih dawn chu awmze nei tak takin an kal thei tawh lo.
Sumdawnna lian tham nei te tan pawha manganthlak hripui hi mi harsa zawkte tan a luhaithlak dan tur chu a hriatthiampui hle, a ti bawk.
Kum 71 mi hian hripuiin rampum a nuai chiah khan a chenpui a chhungte ngaihtuahna a na hle a, kawng lehlamah sum thawk-chhuaktu ber a nih bawk avangin a phur a rit lehzual niin a sawi lang tel a. Boruak a that loh zual zel hnu phei kha chuan restaurant hrang hranga hna thawktute chu sum lo lut ang ang inzat a, insem kual dan ngaihtuah mai turin a hrilh hial a ni.
Mithun-a’n Bollywood-a hming a chher hmâ dinhmun harsa leh hrehawm tak pawh sawichhhuakin, sum a hmuhna tur angah chuan thawh hreh a nei ngai lo.
“Hero angin tuma’n min rawih duh ka ring lo. Chuvang chuan, misual lemah te changkualin, a tawpah phei chuan misual lamthiam ka ni ringawt mai a. Sum ka thawh chhuah theihna turin rim taka hna te thawkin, intihhlimna ang chi ah te ka lâm a, tichuan ei tur ka thawkchhuak thin,” tiin a hun hmasa lama a harsat dan a sawichhuak.