Punjab chief minister hlui, Amarinder Singh chuan Pathianni khan a party din thar, Punjab Lok Congress (PLC) hminga February 20-a an state assembly inthlana bial 22-a chuh turte a puang a. An zingah hian Indian hockey team-a captain lo ni tawh thin, Ajit Pal Singh pawh a tel.
Patiala Urban biala chuh tur, Capt Singh chuan, “Candidate tha tak, tling zo ngei tur vawrh chhuakin, bial (region) leh khawtlanga a kilkhawr ber thleng huap kan hlawm khawm a ni,” tiin thuthar lakhawmtute hmaa an candidate turte a puannaah a sawi.
PLC hian bial 117 inthlan turah BJP leh SAD (Sanyukt) nen tanghovin bial 37-ah an chuh ve dawn a, bial dang pangaa chuhtu turte pawh an sawiho mek tih Singh chuan a sawi.
Bial 37 an chan tur zinga 26 hi Malwa huam chhunga awm a ni a. Helai hi Captain Singh-a leh a chhungte lenna lai niin Patiala lal ram ni thin nen a huam a ni.
Helai bial atang hian kum 2007 inthlan khan Captain Singh hian chiang takin Congress a tlinpui a, lo neih dan hmang nasa takin a siksawi zui a. Tun tumah hian chief minister hlui hi sorkar laipuiin farm law pathum a siam, a hnuh kir leh tak avanga lo neitu lungawi loten an pui zui nasa dawn niin amah thlawptute chuan an sawi.
PLC chief chuan candidate a puan takte chu politics-a hnuhma leh tawnhriat ngah tawh takte bakah an dinna bial theuhva hriat hlawh leh mi zahkai an nih hlawm thu a sawi.
Candidate 22 zingah hian hmeichhia pakhat, Farzana Alam Khan chauh a tel a. Ani hi Shiromani Akali Dal MLA thin niin police chief thin, Izhar Alam Khan-a nupui a ni a, Malwa-a Malerkotla bialah a chuh ang.
Capt. Singh hian Inrinni khan a chenna bial, Patiala Urban-ah inthlan a chuh dawn thu hi a lo sawi tawh bawk.
Mi 22 chuhtu tur zingah hian pariat chu Jat Sikh an ni a, pali chu Scheduled Caste an ni a, Other Backward Class (OBC) mi pathum leh Hindu panga an tel.